ޢަބްދުލްޢަޒީޒު ޖަމާލު އަބޫބަކުރު

މިހާރު ރާއްޖޭގައި އަދަބީ ޖަމްޢިއްޔާއެއްގެ ނަމުގައި ޙަރަކާތްތެރިވާ ހަމަ އެކަނި ޖަމްޢިއްޔާ ކަމުގައިވާ "ލިޔުންތެރީންގެ ގުޅުން" (ޖަމްޢިއްޔާ) ގެ ފުރަތަމަ ދައުރުގެ ރައީސްގެ މަޤާމާއި އެ ޖަމްޢިއްޔާގެ މަޖައްލާ "ލިޔުންތެރިޔާ"ގެ އެޑިޓަރ ގެ މަޤާމުގައި ހުންނެވި މއ. އުރަހަ އަލްފާޟިލް ޢަބްދުއްރަޝީދު ޙުސައިނަކީ ދިވެހި އަދަބީ އުދަރެހުގައި ފާހަގަކޮށްލެވޭ ފަދަ ތަރިއެކެވެ. ސްކޫލް ދައުރުގައި ލިޔުންތެރިކަމާއި ވާހަކަދެއްކުންތެރިކަމުގެ ފަންނުގައި ވިދި، އަލިގަދަ ތަރިއެކެވެ. ސްކޫލް ދައުރު ނިންމަވައިލެއްވި އިރު ލިބިވަޑައިގަތް ގިނަގުނަ ސެޓްފިކެޓްތަކުން އެކަން ސާބިތުވެ އެވެ. އަދި މަޖީދިއްޔާ ސްކޫލްގައި ވަރަށް ޙަރަކާތްތެރިކޮށް ހިންގި ދަރިވަރުންގެ އަދަބީ ޖަމްޢިއްޔާގެ މުއައްސިސަކީ ވެސް ޚުދު ޢަބްދުއްރަޝީދެވެ. ހަމަ އެ ފަދައިން "އެކުވެރީންގެ ގުޅުމުގެ" ރައީސްކަން ވެސް އޭނާ ވަނީ ކުރައްވައިފައެވެ. މީގެ އިތުރުން މަޖީދިއްޔާގެ އެކުވެރީންގެ ގުޅުމުން ނެރުނު "އެކުވެރިޔާ" ގެ 8 ވަނަ ޢަދަދާއި 9 ވަނަ ޢަދަދާއި 10 ވަނަ ޢަދަދުގެ އެޑިޓަރަކީ ވެސް ޢަބްދުއްރަޝީދު ޙުސައިނެވެ.

ޢަބްދުއްރަޝީދު ޙުސައިންގެ އަދަބީ ޚިދުމަތްތައް ހިފެހެއްޓިފައި އޮތީ ހަމަ އެކަނި ސްކޫލްގެ އިމުގެ ތެރޭގައެއް ނޫނެވެ. އެ މަނިކުފާނުގެ އަދަބީ ޚިދުމަތްތައް މުޅި ޤައުމަށް ވަނީ ފޯރައިފައެވެ. ދިވެހިބަހާއި ތާރީޚަށް ޚިދުމަތްކުރާ ޤައުމީ މަރުކަޒުގެ އެންމެ އިސްވެރިޔެއްގެ ގޮތުން އެ މަނިކުފާނުވަނީ ގިނަ ގުނަ ޚިދުމަތްތަކެއް ކުރައްވައިފައެވެ. ލިޔުންތެރިކަމުގެ ދާއިރާގައި "މޫންލައިޓް" ދުވަހު ނޫހާއި "ފަތްތޫރަ" ފަދަ ނޫސް މަޖައްލާތަކުގައި އޭނާ ވަނީ ތަފާތު ލިޔުއްވުންތަކާއި ޅެންތައް ޝާއިޢުކުރައްވައިފައެވެ. ޤައުމީ ފެންވަރުގައި ވިދައިގަތް ކިތަންމެ ޅެމެއްގެ ޝާޢިރަކީ ވެސް ޚުދު އަބްސީ އެވެ. "ރީތި ނަލަނަލަ ހަނދެއް ކުރި އަލީގާ... ރީތީ މޫދެއްގެ ލޮނުގަނޑުމަތީގާ.. ވީތި ހުރިހާ އުފާ އެކުއެކީގާ.... ވީމެ ދެކުދީން އެ 'ލަވް' ބައްތެލީގާ....." ފަދަ އަސަރުގަދަ ޢީޝްޤީ ލަވަތަކާއި "މިނިވަންކަމުން އަޅުވެތި ކަމަށް ދާނަންހޭ؟ ނުދާނަމޭ..، ފިނި ހިޔަލަކުން ގަދަހޫނަކަށް ދާނަންހޭ؟.... ނުދާނަމޭ..." ފަދަ ޖޯޝީ ޤައުމީ ލަވަތަކާއި، ސާފު ޗެމްޕިއަންޝިޕްގެ ފުޓްބޯޅައިގެ ރަންމެޑެލި ޙާޞިލްކުރި ދިވެހި ޤައުމީ ޓީމަށް މަރުޙާބާ ކިޔުމަށް ތައްޔާރުކުރި ފޯރިގަދަ ލަވަ "...މަރުހަބަ.. މަރުހަބަ.. ޤައުމީ ޓީމަށް މަރުޙަބާ!. . . " ފަދަ އެތައްބައިވަރު ލަވައާއި ޅެންތަކަކީ މިއަދުވެސް ދިވެހި އަދަބީ ޚަޒާނާގެ މުތްތަކެކެވެ.

ޅެންވެރިކަމާއި ލިޔުނތެރިކަމުގެ އިތުރުން ޢަބްދުއްރަޝީދު ޙުސައިނަކީ ޤައުމީ ފެންވަރުގައި ފާހަގަކޮށްލެވޭ މޮޅު ހުނަރުވެރި ވާހަކަދެއްކުންތެރިއެކެވެ. އައިބައިފިލީގެ ހަމަތަކާއި ބަހުގެ އެހެން ޤާވާޢިދުތަކަށް އިޙުތިރާމްކުރެއްވުމާއެކު އެ މަނިކުފާނުގެ ފަޞާޙާތްތެރި ދޫފުޅުން ބަލާޣާތްތެރިކަމާއެކު އޮއްސަވާ ފަށުވި ޢިބާރާތްތަކަކީ ވާހަކަދެއްކުންތެރިކަމުގެ ދާއިރާއަށް ވަންނަން އެދޭ ބަޔަކަށް ނަމޫނާ ތަޤްރީރުތަކެކެވެ.

ބަހާއި އަދަބުގެ ދާއިރާގައި ޢަބްދުއްރަޝީދު ޙުސައިންގެ މަޤާމަކީ އުސް މަޤާމެކެވެ. އަދަބިއްޔާތުގެ ތެރޭގައި ހިމެނޭ ޅެންވެރިކަމާއި ލިޔުންތެރިކަމާއި ވާހަކަދެއްކުންތެރިކަމުގެ އިތުރުން ސްޓޭޖް ޑްރާމާގެ ދާއިރާގަައި ވެސް އަބްސީ އަކީ ފާހަގަކޮށްލެވޭ ކުޅަދާނަ މުމައްޘިލެކެވެ. އަދި ދިވެހިބަސް ހެޔޮ ގޮތުގައި ބޭނުންކުރަން ދަސްކޮށްދެއްވުމަށްޓަކައި މިއަދުވެސް އެ މަނިކުފާނު ގެންދަވަނީ އުނގަންނަވައިދެއްވުމުގެ ޢަމަލީ މަސައްކަތްޕުޅުތައްވެސް ކުރައްވަމުންނެވެ. މީގެ އިތުރުން އަދި ދިވެހިބަސް ކުރިއަރުވައި ތަރައްޤީކޮށް ރަދީފު މުޠާލިޢާކޮށް ޝާއިޢުކުރުމުގެ މަސައްކަތްކުރާ "ބަސްކޮމިޓީ"ގެ އާދެ! ދިވެހިރާއްޖޭގެ ޤައުމީ ޔުނިވަރސިޓީގެ ދިވެހިބަހާއި ތާރީޚާ ބެހޭ މަރުކަޒުގައި އޮންނަ "ބަސްކޮމިޓީ"ގެ މިހާރުގެ ރައީސަކީ ވެސް އެ މަނިކުފާނެވެ. މި ފަދަ އެތައް ސަބަބުތަކަކަށްޓަކައި އަދި އެ މަނިކުފާނު ދިވެހިބަހާއި އަދަބަށް ކުރެއްވި އަދި ކުރައްވާ ގިނަގުނަ ޚިދުމަތްތަކުގެ އަގު ވަޒަންކުރައްވައި، ދިވެހި ސަރުކާރުން އެ މަނިކުފާނަށް ވަނީ، ދިވެހިބަހާއި އަދަބިއްޔާތުގެ ދާއިރާއިން ޤައުމީ ޚިދުމަތުގެ ޝަރަފުވެރިކަމުގެ އިނާމު ވެސް އަރުވައިފައެވެ.

އިކޮނޮމިކްސް އާއި ނޭޝަނަލް މެނެޖްމެންޓް އިކޮނޮމިކްސްގެ ދާއިރާއިން ޕާކިސްތާނާއި ތައިލެންޑާއި އޮސްޓްރޭލިއާގައި މަތީ ތަޢުލީމު ޙާޞިލުކުރައްވައިފައިވާ ޢަބްދުއްރަޝީދު ޙުސައިނަކީ ކެބިނެޓްގެ އެތައް ވަޒީރުކަމެއްގެ އިތުރުން ދައުލަތުގެ ގިނަ މަޤާމުތަކެއް ފުރުއަވައިފައިވާ ބޭފުޅެކެވެ. ރާއްޖޭގެ މީހުން އުޅޭ ހުރިހާ ރަށަކާއި ގިނަ ފަޅުރަށްރަށަށް ވެސް ވަޑައިގެންފައިވާ އަބްސީ ވަނީ ދުނިޔޭގެ ހުރިހާ ބައްރަކަށް ދަތުރުފުޅުކުރައްވައިފައެވެ.

މ. ދިއްގަރަށް އުފަން ޢަބްދުއްރަޝީދު ޙުސައިން، ހުސްވަގުތު ހޯއްދަވައިގެން ކުރައްވާ ކަންކަމުގެ މައްޗަށްވެސް ބަލައިލާނަމެވެ. މި ގޮތުން ޅެންހެއްދެވުމާއި ދިވެހި އުރުދޫ ލަވަ އެއްކުރެއްވުމާއި ފޮތް އެއްކުރައްވައި ގެންގުޅުއްވުމަކީ އެ މަނިކުފާނުގެ ހޮބީ އެވެ. ދިވެހިތާރީޚާއި ދިވެހި އަދަބިއްޔާތުގެ ތަފާތު މަޢުޟޫޢުތަކަށް، ނޫސް މަޖައްލާތަކަށް ލިޔުއްވުމަކީވެސް އެ މަނިކުފާނުގެ އާދަފުޅެކެވެ. އެ މަނިކުފާނަކީ ޢިލްމަށް ޚާއްޞަކޮށް އަދަބިއްޔާތަށް ލޯބިކުރައްވާ ފޮތްތެރިއެކެވެ. ކުޅިވަރެއްގެ ގޮތުން އެ މަނިކުފާނު ކުރައްވާ ކަމަކީ މަސްވެރިކަމެވެ. އާދެ! އެއީ މަސްވެރި ރަށަކުން އުފަންވެ ވަޑައިގަތް ކުޅަދާނަ މަސްވެރިއެކެވެ.

އާދޭހެވެ! ޢަބްދުއްރަޝީދު ޙުސައިންގެ އަރިހުގައި އަދަބީ ބައެއް މަސައްކަތް ކުރުމުގެ ފުރުޞަތު ލިބިފައިވާތީ އެ މަނިކުފާނާ ބެހޭ ގޮތުން ލިބިފައިވާ މަދު މަޢުލޫމާތުކޮޅެއް ކިޔުންތެރީންނަށް ޙިއްޞާކޮށްލުމަށްޓަކައި ގަލަން ޙަރަކާތްތެރި ކޮށްލީއެވެ. އެ މަނިކުފާނާ ބެހޭ ގޮތުން ތަފްޞީލީ މަޒުމޫނެއް ލިޔުމަކީ އަޅުގަނޑަށް ކުޅަދާނަ ކަމަކަށް ނުވާތީ، ސާދާ، ސަމާސާ މިޒާޖުގެ ވެރި ޢަބްދުއްރަޝީދުގެ އަރިހުން މާފަށް އެދެމުން އަޅުގަނޑުގެ މި ލިޔުން ނިންމައިލަމެވެ.

-----------------
(ނިމުނީ)