ވަރަށް ރަނގަޅު ޚިޔާލު ފުޅެކެވެ. އަޅުގަނޑަށް ވިސްނޭ ގޮތުގައި ދީން ކުރިއަރުއްވާން މަސައްކަތް ކުރައްވާ ވަރަށް ގިނަ ބޭފުޅުންނަކީ ވަރަށް ތަޤުވާވެރި، އަދި ދީން ދެކެ ލޯބިވާ ބޭފުޅުންނެވެ. އެކަމަކު އެބޭފުޅުންގެ ތަޤުވާވެރިކަމުގެ ތެރެއަށް ވަރަށް ބޮޑު ކަމެއް ގެއްލިގެން ގޮސްފައިވެ އެވެ. ވަރަށް ގިނަ މަޢުލޫމާތުތަކެއް އެ ބޭފުޅުންގެ ސިކުނޑިފުޅަށް ބީރައްޓެވި ވެފައިވެއެވެ. ދުނިޔެއަށް އަންނަ ބަދަލެވެ. ދީނުގެ ޢަދާވާތްތެރިންގެ ހީލަތްތެރި ރޯލެވެ. ސައިކޮލޮޖިކަލް ގޭމެވެ. ނަތީޖާއަކީ، އަދާވާތްތެރިން ފަސާދަކުރަން ބޭނުން ކުރާ ހަތިޔާރާއި، ދީންވެރިން އިޞްލާޙު ކުރަން ބޭނުންކުރާ ހަތިޔާރުގެ ފެންވަރު ތަފާތުވުމެވެ. އޭގެ ސަބަބުން ޢަދާވާތްތެރިން ކުރި އަރައިދަނީ އެވެ. އެމީހުންގެ ދަޅަގަދަ ކުލަތައް މުޖުތަމަޢަށް ރީތިވަނީ އެވެ.

ދެވަނަ އަށް ދަންނަވާލަން އޮތީ ދީންވެރިކަމެއް ނެތި ނަޢީމު ތިޔަ ވިދާޅުވާ ފަދަ މަސައްކަތުގައި ބައެއް މީހުން އުޅޭކަމެވެ. އެފަދަ މީހުން ޙަޤީޤަތުގައި ދީނަށް ލޯތްބެއް ނުކުރެ އެވެ. ނުވަތަ ދީނަށް ލޯބިކުރަން ބޭނުން ވިޔަސް އެކަން ކުރާނީ ކިހިނެއްކަމެއް ނުދަނެއެވެ. ދީން ފަތުރަންވާނީ ޙިކުމަތްތެރި ކަމާއެކީގައި ކަމަށް ކީރިތި ޤުރުއާނުގައި އޮންނަ އާޔަތް ހަމަ އެންމެން ވެސް ކިޔަވައެވެ. އެކަމަކު އޭގެ ސާފު މަފުހޫމު އެނގެނީ ކިތައް މީހުންނަށް ބާވައެވެ؟

އަދި ވެސް އެއްވާހަކަ ދަންނަ ވާލާނަމެވެ. ކީރިތި ރަސޫލާ އަޅުގަނޑު މެންނަށް ދެއްކެވީ ސާފު މަގެކެވެ. ތެދުމަގެކެވެ. އެކަލޭގެފާނުގެ ދޫފުޅުވެސް ސާފެވެ. ހިތްޕުޅުވެސް ސާފެވެ. ނިޔަތްވެސް ސާފެވެ. ތެދުވެރިއެވެ.

ރާއްޖޭގެ ޙާލަތަށް ބަލާއިރު، މި ސިފަތައް ފެންނަނީ ކިތައް ޢިލްމުވެރިންގެ ކިބައިންތޯ ވިސްނާލަން ޖެހެ އެވެ. މުސްލިމަކީ ތިމާގެ އަތާ ދުލުގެ ނުބައިކަމުން އަނެއް މުސްލިމަކަށް ސަލާމަތްކަން ދޭ މީހާކަށް ބައެއް ބޭފުޅުން ވިދާޅުވަނީ އެއީ ކީރިތި ރަސޫލާގެ ބަސްފުޅެއްކަމަށް ދަލީލު ދައްކަވަމުންނެވެ. އެހެން ކަމަށް ވާނަމަ، އެކަމަށް ޢަމަލު ކުރުން ލާޒިމު ވެއެވެ. އެކަމަކު، މި ނަމޫނާ ފެންނަނީ ކިތައް ޢިލްމުވެރިންގެ ކިބައިންބާވަ އެވެ؟

ދެން އޮތީ އަޅުގަނޑުގެ އެންމެ ފަހު ވާހަކަ އެވެ. މި ރާއްޖެއަކީ ގިނަ ދީނީ ޢިލްމުވެރިންތަކެއް އުޅުއްވާ އަވަހާރަ ވެފައިވާ ރާއްޖެ އެކެވެ. އެބޭފުޅުންގެ ވީޑިއޯ ތަޤުރީރުތައް ނެތަސް ފޮތްތައް އެބަހުއްޓެވެ. އަޅުގަނޑުމެން ކުޑަ އިރު މަންމަ މެން އެބޭފުޅުންގެ ނަންފުޅު ގަންނަނީވެސް ޤަދަރާ އިޙްތިރާމާ އެކުގައެވެ. އެ ނަންފުޅުތަކަށް ވެސް ޝައުޤުވެރި ވެވެ އެވެ. އޭން ބޭފުޅެއްގެ ލިޔުއްވުމެއްގައި ދުވަހަކުވެސް އެހެން ޢިލްމުވެރިޔަކަށް އެހެން މުސްލިމަކަށް އައިބު ބަހެއް ވިދާޅުވެފައެއް ނެތެވެ.

އިސްލާމީ ރިވެތި މަގުގައި ވިސްނާށެ ކުރި ހޯދުމުގައި
.......... ދަސްކުރާށޭ ހެޔޮގޮތުގައި އިސްނަގައި އުޅެން މިކަމުގައި
ފަސްނަމާދު ހަމަ ވަޤުތުގައި ފަސްނުވާނެހެން ކުރުމުގަައި
.......... ޤަޞްދުކޮށް މާތް ޢަޒުމުގައި ޖިސްމު ހާނުވާށެ އެގޮތުގައި