މިލިޔުން ކިތަންމެހާވެސް މޮޅެވެ. އެކަމަކު އުސްތާޒުލް ޖީލް އާއި މެދު އަޅުގަޑުގެ ހިތުގައި އުފެދިފައިވާ ޤަދަރާއި ހައިބަތަށް ޝައިޚްގެ މިފަދަލިޔުއްވުން ތަކުގެ ސަބަބުން ހަޤީޤަތުގައިވެސް ހިރަފުސް އަރާކަމުގައި ދެންނެވިދާނެއެވެ. (ޝައިޚުގެ މިފަދަ ޚިޔާލުތައް ޝައިޚުއާއި ގުޅުވަން އަޅުގަނޑަށް ވަރަށް އުނދަގުލެވެ. )

ބައެއް މީހުން ޙަޔާތުގެ މާނަ ކުރަނީ ކަނޑިއެއްގެ މިޔަޔަށް ވުރެވެސް ހަނިކޮންނެވެ. އެ ޙަޔާތުގައި ހިނގަން އޮތް މަގުކަމުގައިވާ ދީނުގެ މާނަ ކުރަނީ އަދި އެއަށްވުރެ ވެސް ހަނިކޮންނެވެ. އެ ފަދަ މީހުންގެ ވިސްނުން ހުންނަނީ އިންސާނާގެ ފިޠުރަތާއި، ޠަބީޢަތާ ނުގުޅޭ ހުވަފެނީ ޢާލަމެއްގަ އެވެ. އެ ކަމަކު އެ މީހުންނަށް އެކަމެއް ނޭނގެ އެވެ. އެމީހުން ހީކުރަނީ އެއީ ރޫޙާނީ ޢާލަމެއްގައިވާ ފިކުރުތަކެއްކަމަށެވެ.

ދީނަކީ އިންސާނުންނަށްޓަކައި ބާވާލެއްވި އެއްޗެކެވެ. އެހެންކަމުން އެދީން އިންސާނީ ޖަޒުބާތާއި އިޙްސާސްތަކަށް އިޙްތިރާމު ކުރާނެ އެވެ. ޢިލްމާ އަދަބިއްޔާތާއި ތާރީޚު ހިއްސާކުރާނެ އެވެ. ސައިންސާއި އީޖާދުގެ އުދަރެހަށް ޖާގަ ދޭނެ އެވެ. އެހެންކަމަށް ވާނަމަ، މުސްލިމު ދަންނަބޭކަލަކު، މޮޅު އަދީބަކަށްވެއްޖެ ހާލަތުގައި، ނުވަތަ ކުޅަދާނަ ޅެންވެރިޔަކަށް ވެއްޖެ ޙާލަތުގައި އޭނާގެ އަދަބީ އީޖާދީ އުފެއްދުންތަކާމެދު އިސްލާމީ އުންމަތް ފަޚުރުވެރިވާންޖެހޭނެ އެވެ. އެކަމަކު ބައެއް މީހުންގެ ވިސްނުމުގައި ދީނުގެ މާނައާއި އިންސާނި ޙަޔާތުގެ މާނަ ހަނިވެފައިވާ މިންވަރުން، މުސްލިމުންގެ ޙަޟާރަތަކަށް މިއަދު މާބޮޑު ޖާގަ އެއްނެތެވެ. އުސްތާޛު ޖަމީލުގެ މި އުފެއްދެވުމަކީ އަދަބީގޮތުންނާއި ތާރީޚީ ގޮތުންނާއި، ފިކުރީގޮތުންނާއި، ފަލްސަފީގޮތުން ވެސް އާދަޔާ ޚިލާފު މޮޅު ލިޔުއްވުމެކެވެ. ދީނާ ޚިލާފުކަމެއް ނެތި އިޖުތިމާޢީ މެސެޖުތަކެއް ހިމެނޭ ލިޔުމެކެވެ. މާތް ﷲ އެމަނިކުފާނަށް ރަޙްމަތް ލައްވާށި އެވެ.