ފޮތް ލިޔުއްވީ: ފަޟީލަތުއްޝައިޚް ޢަބްދުﷲ ޖަލާލުއްދީން
ދޭހަ:       އާދަމް ނަޞީރު އިބްރާހީމް/ތޮއްޑޫ

މި ފޮތުގައި ބަޔާން ކޮށްދެއްވާފައިވަނީ،  ދުނިޔޭގެ ނިމުން ކައިރިވަމުން އަންނަ އިރު، ފެންނަމުންދާނެ އެކަމުގެ ޚާއްޞަ ޢަލާމާތްތަކެވެ. ޤިޔާމަތުގެ ޢަލާމާތްތަކެވެ. ފޮތުގެ ފުރަތަމަ ޗާޕު ނެރުއްވާފައިވަނީ، 1967 ވަނަ އަހަރުއެވެ. 

.....ކުރީގެ ބަޔާގުޅޭ...

31- ނުރައްކައު ވަބާޔާ ނުބައި ގިނަ ބަލާތައް
                    ދުރަށް  މާ ނުބައިގޮތްމަތީން   ފެތުރިދާނޭ

އެކި ޒާތްޒާތުގެ މުޞީބާތްތައް ގިނަވެ ދުނިޔޭގެ އެކި ކަންކޮޅުތަކުގައި އާންމު ވެދާނެއެވެ.
ފަރުވާއިން ހައްލު  ނުހޯދޭ ތަފާތު ބަލިތަކާއި، އެފަދަ ބޮޑެތި އާފާތްތަކެވެ.

32- ތަދާ ހޫނު ދުއްތަައް އެކީ އެކި ސިފައިގައި،
                    އަނދާތީ އެތަން މިތަނުގައި    ޚަބަރުވާނޭ

އަނެއްކަމަކީ ތަދުމަޑުކަަން އާންމުވުމެވެ. ކާބޯ ތަކެތި ނުލިބުމުގެ ދަތިކަން އިޙްސާސް ކުރަންޖެހުމެވެ.
އެތައްބަޔަކު ހައިހޫނުކަމުގައި އުޅެންޖެހި، އެކަމުގެ ހިތްދަތި އުނދގުލާއި،
ދުއްތުރާތައް ތަޙަންމަލު ކުރަންޖެހުމެވެ. ދުނިޔޭގެ އިޤުތިޞާދު ފުނޑުފުނޑުވުމެވެ.

33- އުޅެންވީ ގޮތާ ހެޔޮ ޢަމަލުތައް އެ ފިޔަވައި،
                    ކުޅޭ ކުޅިވަރަށް ބޮޑެތި  ސާބަސް  ކިޔޭނޭ

ކަން މިހެން އޮތަސް އިސްލާމްދީނުގެ ސާފު ސީދާ ތެދުމަގުގައި ސާބިތުވެ ތިބޭ މީހުންނަކީ މަދުބައެކެވެ.
އިންސާނީ މުޖުތަމަޢު އޮންނާނީ  ކުޅިވަރާއި، ވިޔަޔާނުދާ މަޖަލުގައި އަވަދިނެތިފައެވެ.

34- މިކަން ދެކޮޅުވިދި މެދުނަގައި އަންނަ އިރުގާ
                    ނިކަން ގާތުގައި ކޭތަ އިރު ހަނދު ހިފާނޭ

މި ކަންކަން ކައިވަމުން އަންނާނީ ވަރަށް ބާރަށެވެ.  ވިހަލުމަށްޓަކައި،  ބޯކޮޅާއި ނިގޫކޮޅު ބިމުގައި ވިއްދައި، މެދު ހަށި އުފުލަމުން އަންނަ ނުރައްކާތެރި ހަރުފައެއް އަންނަހައި، ހަލުއިކަންމަތީގައެވެ.  މި ގޮތުގައި ދުނިޔެއަށް ބަދަލުތައް އަންނަމުންދާއިރު،  ކޭތަ ހިފުމުގެ ނިޒާމަށްވެސް ބަދަލު އަންނާނެއެވެ. އަންޒަމާނުއްސުރެ އިރު ހަނދުގައި ކޭތަ ހިފަމުން އައި ނިޒާމު ފިޔަވައި، ގާތްގާތުގައި ކޭތަ ހިފަމުންދާނެ އެވެ.

35- އަރަންހުރި ހިސާބަށް މިކަންކަން އެރީމާ،
                    ވަރަށް ބޮޑުވި ހަނގުރާމައެއް އެބަ ފޮށޭނޭ

ކޮންމެއަކަސް، ދާންވީ ހިސާބަށް މިކަންކަން ދިޔައިމައި، ދެން ވަރަށް ނުރައްކާތެރި ބިރުވެރި ހަނގުރާމައެއް ފެށިދާނެއެވެ.

36- ލެޔަށް ހޫނުކަން ލިބި މި ނައުޢުގެ އެކީގާ،
                     އެޔަށް އިޝްތިރާކެއް މި މުޅި ދުނިޔަ ދޭނޭ

އިންސާނީ ދަރިފަސްކޮޅުގެ އެންމެންހެން މި ކަމުގެ ޖޯޝުގައި ތެދުވެދާނެއެވެ. މުޅި ދުނިޔެ މި ހަނގުރާމައިގައި ބައިވެރިވާނެއެވެ.
 

37- ޒުވާނުންނެ މަގުވެސް ތިޖާރީ ހުރަސްވެވި،
                      މުވާޞަލަތުވެސް      ރަށްތަކާ   ވެކިވެދާނޭ

ޒުވާން ކުދީންނެވެ! ބުނަންހެއްޔެވެ! މި ހަނގުރާމައިގެ ސަބަބުން ވިޔާފާރީގެ މަގުތައްވެސް ބަންދުވެދާނެއެވެ. އެފަދަ ހުރިހާ މުޢާމަލާތްތަކަށް ހުރަސްތައް ކުރިމަތިވެ ހުއްޓުން އަރާނެއެވެ. ވަކި ހިސާބަކުން، ރަށްރަށާއި، ޤައުމުތަކުގެ މެދުގައި ހިނގަމުންމިދާ  މުވާޞަލާތީ  ޚިދުމަތްވެސް ކެނޑިގެން ދާނެއެވެ.

38- މަރަށް ތަކެތި ދުނިޔޭގެ ދެން ތެޅިގަތީމާ، 
                       ވަރަށް ތަކެތީ ކާބޯ އިނގޭ    އަގުއަރާނޭ 

އެހާރުން އެދެން،  ދުނިޔޭގެ ރޯ މުދަލަށް ދަންދެން އޭގެ އަޖަލު ގާތްވީއެވެ. އެހެނީ ހަނގުރާމައިގެ ސަބަބުން ދަނޑުފަނގުތަކާއި، އެހެނިހެން ވަސީލަތްތައް ފަނާވެގެންދާނެއެވެ. ނަތީޖާއެއްގެ ގޮތުން ކާބޯތަކެތީގެ އަގުތައް ފިސާރިޔަކަށް  މައްޗަށް ޖެހިލާނެއެވެ. ކޭންބުއިމަށް ބޭނުންވާ ތަކެތީގެ އަގުތައް އިންތިހާޔަށް ބޮޑުވާނެއެވެ. 

ނުނިމޭ.. ބާކީ  195 ބައިތު..

މިހާތަނަށް ހުށަހަޅާފައިވާ ޚިޔާލުގެ އަދަދު (8)

...
ލިޔުނީ ނުސްރާ, 2008-12-18 00:36:23

34 ވަނަ ބައިތުގެ ޝަރަހާގަ އެއޮތް ކައިވުމުގެ މާނައަކީ ކޮބާތޯ؟

...
ލިޔުނީ ސަމީރު, 2008-12-18 00:59:38

މިހާރު ދުނިޔެއަށް ވަމުންމިދަނީ މިޅެމުގައި ބުނާގޮތްދޯ. ޖަލާލުއްދީނަށް ވަރަށްބޮޑަށް ދުރުވިސްނޭކަމަށް ފެނެއެވެ.

...
ލިޔުނީ އިޞްލާޙު, 2008-12-18 04:31:39

ކައިވުން އެއީ ކުށް ގޮތެކެވެ. ރަނގަޅު ގޮތަކީ ކައިރިވުމެވެ. އެއީ ޓައިޕްކުރުމުގެ މައްސަލައެކެވެ.

...
ލިޔުނީ މަހާނަގާ, 2008-12-19 14:39:54

މިއާޓިކަލްގައި މިހާރުގެ ޒުވާނުންކިޔަން ވަރަށް ބޭނުންތެރި އިންފޮމޭޝަން ހުރިކަމަށް ގަބޫލުކުރަން.

...
ލިޔުނީ މުސްލިމް, 2008-12-19 14:51:44

ގިޔާމަތްދުވަހާމެދު މީހުން ބިރުވެތިވާފަދަ މިފަދަ ލިއުންތައް މިސައިޓުން ގިނައިން ދެކެން ބޭނުން

...
ލިޔުނީ މުތަނައްބީ, 2008-12-19 20:54:23

ކިޔާފައި މިޅެން ބިރު ހިތަށް ވަދެ ދެޔޭ،
ޤިޔާމަތް ދުވަސް ގާތްވެޔޭ ހީވެޔޭ،
ޚިޔާލާ ފިކުރު ގޮސް މަޙުޝަރަށް ފޯރަޔޭ،
ނިޔާމައިގެ އީމާން ހިތަށް ވަދެދެޔޭ.

ނަޞީރޭ ލިއުއްވާށެ އަދި ވެސް ބޮޅެއް،
ބަޞީރަތުގެ ބާރުން ކުރާ ޝަރަޙައެއް،
ނަސީބާ ފަލާޙުގެ ސަރާސަރު މަގެއް،
ވަސީލަތެކެ ތީ އަދި ނިކަން ހެޔޮ ކަލާމެއް.

...
ލިޔުނީ މަރިޔަމް, 2008-12-30 09:55:05

މާމަ ބުނާހެން މިއޮތީވެފައެވެ. '' ކޮންމެ ދެމީހަކަށް ދުއްވާ އެއްޗެއް، ހިކަނދި ކަންފަތު މުދިލެވޭނެ، އުޅަނބޮށިން ވާހަކަދައްކާނެ، ދުވާލަކީ ރޭކަމަށް އަދި ރެއަކީ ދުވާލުކަމަށް ހަދައިގެން އުޅޭ މީހުން ގިނަވާނެ، އަންހުން ފިރިހެން ހެދުން އަޅާ އަދި ފިރިހެނުން އަންހެން ހެދުން އަޅާނެ '' މިހުރިހާ ކަމެއް ދިމާވެ ނިމެމުން ދާތީ ގިޔާމަތް ކައިރިވެއްޖެކަން އެބައެނގެއެވެ.

...
ލިޔުނީ އަސްލަމް ޢަބްދުﷲ, 2008-12-30 14:32:17

މިކަން ދެކޮޅުވިދި މެދުނަގައި އަންނަ އިރުގާ
ނިކަން ގާތުގައި ކޭތަ އިރު ހަނދު ހިފާނޭ
----------------------------------------------------------------
މިބައިތުގެ ޞަދުރުގެ ދޭހަ ވަރަށް ރީތި. ފުރަތަމަ ފަހަރު ކިޔާލާފަވެސް ހިތަށް އެރީ ފަޟީލަތުއްޝައިޚް ޢަބްދުﷲ ޖަލާލުއްދީން މުދައްރިސް ނަޞީރު އަރިހުގައި ތިމަންނަ ސިފަ ކޮށްދޭން ބޭނުންވަނީ ހަރުފައެކޭ ބުނެފައިވާހެން. ވަރަށް ކަމުދޭ.

ޚިޔާލު ހުށަހަޅާ

ހުށަހަޅާ

ނަން

ޚިޔާލު ލިޔާބައި ކުޑަކުރޭ | ލިޔާބައި ބޮޑުކުރޭ

މަތިން ފެންނަ އަކުރުތަށް ހުރިގޮތަށް (އިގިރޭސިން) ލިއުއްވާ

ހުށަހެޅުމަށްޓަކައި މަތިން ވާތްފަރާތުގައިވާ "ހުށަހަޅާ" ބަޓްން ބޭނުންކުރަށްވާ