الدجال المحذرفيه

ދައްޖާލު އެރުން

        ކުރީގެ ބަޔާ ގުޅޭ.....

63 - ކިޔަންވެސް ކިޔާހެން ކިޔާ ޚަބަރުތަކުގާ
            މިޔަށް ފަހު އެ ދައްޖާލު އެބަ ފާޅުވާނޭ

އެނގިފައިވާ އެނގުންތަކަށް ބަލާއިރު، މި ހާތަނުން ދެން ދައްޖާލު ފާޅު ކުރައްވާނެއެވެ.  ދައްޖާލު އަރާނެއެވެ.

64 - ނުރައްކާ ވަރަށް ފިތުނަވެރި ހެއްލުމެއްގާ
                މި ރައްކާނުތެރި ލަޢުނަތަކު އެބަ ހިނގާނޭ

ދައްޖާލުގެ އޮޅުވާލުންތަކަކީ ވަރަށް ނުރައްކާތެރި ފިތުނަ އެކެވެ. އޭނާ އެ ފިތުނަ އާންމު ކުރަމުން ބިމުގެ އެތަން މިތާނގައި ހިނގާނެއެވެ. (ނޯޓު:  އޭނާގެ ފިތުނަ އަކީ، އޭނާއަކީ ކަލަކު ކަމަށް ދަޢުވާ ކޮށް މީސްތަކުން ވާވައްދާން މަސައްކަތްކުރުމެވެ.)

65 - ހިފީމާ ޔަހޫދީ ބަޔަކު މީގެ ކޮޅުގާ
                މި ފިތުނާ އެކީހެން     އެބޯ އާންމު ވާނޭ

ޔަހޫންދީންގެ ބަޔަކު ދައްޖާލުގެ ވާހަކަތައް ގަބޫލުކޮށް، އޭނާއަށް ބައިވެރިވުން ދޭނެއެވެ.  

66 - މެނޫނީ އެ ފުރަ އިތުރު މައްކާ މަދީނާ 
                އެ ނުލަފާވި ދައްޖާލު ބިމުގައި ހިނގާނޭ

މާތްވެގެންވާ މައްކާއާއި، މަދީނާ ފިޔަވައި އެހެން ހުރިހާ ތަނެއްގައި ދައްޖާލު ދަތުރު ކުރާނެއެވެ. އެހެން ހުރިހާ ރަށަކަށް އޭނާ އަރާނެ އެވެ. 

67 - ހިފާނޭ އެކީ ނަރަކައެއް ސުވަރު ގެޔަކާ 
               މި ފަސްމީރު ޝައިޠާނު މީހުން ދެކޭނޭ

ދައްޖާލާ އެކު ނަރަކައަކާއި ސުވަރުގެއެއް ވާނެއެވެ. (ނޯޓު: މި ތާނގައި ޝައިޠާނާގެ ކުރިޔަށް ''ފަސްމީރު'' މި ލަފުޒު އިތުރު ކުރައްވާފައި އެއޮތީ މަޖާޒީ ގޮތުންނެވެ. ފުރައްސާރައިގެ މާނައިގައި ކަމަށް ބެލެވެއެވެ. މަޤުޞަދަކީ، ޝައިޠާނެއްގައި ހުންނާނެ ނުބައި ހުރިހައި ސިފައެއް އޭގެ އެންމެ އިމު ގޮތުގައި ދައްޖާލުގެ ކިބައި އެބަހުރިކަން ނުވަތަ ހުންނާނެކަން ބަޔާން ކުރެއްވުމެވެ.)
 

68 - ޤަބީލުން ކަރާމަތުގެ ކަންތައްތަކެއްވެސް
                 ޚަބީރުންނެ  ދައްޖާލު     ދައްކައި ހަދާނޭ

ކުރީކޮޅުގައި އޭނާގެ ފަރާތުން އާދަޔާ ޚިލާފު ކަންތައް ތަކެއް ދައްކާނެ އެވެ.  (ދައްޖާލު އަރަނީ އޭނާއަކީ ކަލާނގެ ކަމަށް ދަޢުވާ ކުރާ ހާލުގައި ކަމަށްވާތީ،  މި ދައްކާ ކަންތައްތައް އޭނާ ދައްކަނީ އެކަމުގެ ހެއްކެއްގެ ގޮތުންނެވެ. ޙަޤީޤަތުގައި މި ކަންތައްތަކަކީ، އެއްވެސް އަސްލެއްނެތް ދެއްކުންތަކެކެވެ. މޫސާގެފާނުގެ ފިރުޢައުނަށް މާތް ﷲ ދެއްވި ފަދަ އިމްތިޙާނެކެވެ.) 

69 - އިރާ ތަރިހަނދަށް ވެސް ބައެއް ފަހަރު މި ސޮރުގެ 
                 ގިރާ ވޮޑެނި   މަންތަރުގެ   އަސަރެއް ކުރާނޭ

އިރު ހަނދާ ތަރި ތަކަށް ވެސް އޭނާގެ މި މަކަރުވެރި އަސަރު ފޯރާނެއެވެ. މާނަ އަކީ އެތަކެތީންވެސް މި ފަދަ އަސަރުތައް ފެންނާނެ އެވެ. އެތަކެއްޗަށް އޭނާ ނުފޫޒު ފޯރުވާކަމަށް މީހުންނަށް، ހީވާކަހަލަ ކަންތައްތަކެއް ވެސް ބައެއް ފަހަރަށް އޭނާ ތަމްސީލު ކުރާނެއެވެ. 

70 - ބައެއް މުސްލިމާނީ ނަވާ އޮޑިފަހަރުވެސް
                 ވަޔެއް ނުލިބި ހެޔޮ މިބުނި އޮއިގައި ދަމާނޭ

ނަތީޖާއަކަށްވާނީ އެއީ ޙަޤީޤަތެއް ކަމަށް ގަބޫލު ކުރެވި މުސްލިމު ބައެއް އަންހެނުންނާއި ފިރިހެނުންނަށް ވެސް  ހަމަ މަގުން ކަސިޔާރުވެވޭގޮތްވުމެވެ.  އެ ސޮރަށް ''އީމާން'' ވެވޭ ގޮތްވުމެއެވެ. މާތް ﷲ އަށް އީމާންވުމުގެ ސާފު ތެދު މަގަށް ފުރަގަސް ދެވޭ ތަން އައުމެވެ.

71 - ނެގޭނޭ ނިތުން އެސޮރު ކުފުރުގެ އަކުރުތައް
               އެނގޭ ބަޔަކު އެ އަކުރު ކިޔަންވެސް ކިޔާނޭ

އެހެން ނަމަވެސް ދައްޖާލުގެ ނިތުގައި އޭނާ އަކީ ކާފަރެއްކަން އެނގޭނެ އަކުރުތަކެއް ނުވަތަ ނިޝާނެއް އުފުލައި ނެގިފައި ހުންނާނެ އެވެ.  ޞައްޙަ އީމާންކަމުގެ އަހުލުވެރިން އެ އަކުރު ކިޔަން ދަންނާނެ އެވެ.  އެމީހުން އެކަން ދެނެގަންނާނެ އެވެ.

72 - ނުވާބަޔަކު އީމާން އެ ކާފަރުގެ މައްޗަށް
               ސުވާސާ އެ ނަރަކައިގެ ތެރެއަށް އުކާނޭ

އެމީހުން އޭނާގެ ގޮވާލުމަށް އިޖާބައެއް ނުދޭނެ އެވެ. އޭނާ އަށް އީމާނެއް ނުވާނެ އެވެ. އެފަދަ މީހުން އޭނާގެ އަސްލެއްނެތް، ނަރަކައިގެ ތެރެއަޔަށް އުކާނެ އެވެ.  ފެންނަ ފެނުމަށް އީމާން ނުވި ކަމުގެ ކުށުގައި އެމީހުންނަށް ނަަރަކައިން އަޒާބު ލިބެމުން ދާނެއެވެ. (ނޯޓު: ސުވާސާ ނަރަކަ މިއީ ވެސް މަޖާޒީ ގޮތެއްގައި ގެންނަވާފައި އޮތް ނަމެކެވެ. އަސްލު ސުވާސާއަކީ ރަނާއި ރަތުލޯ އެއްކޮށްގެން ހަދާފައި ވާ މައުދަނެކެވެ. ބޭރުފުށަށް ފެންނަ ފެނުމުގައި ހީވާނީ ހަމަ އަސްލު ރަންހެނެވެ.) 

73 - މިޔާ އިދި ކޮޅަށް ޖެހުނު މީހަކު ވެ އީމާން
                ޚިޔާނާތް ސުވަރުގެޔަށަ ފޮނުވައި އުޅޭނޭ

ހަމަ އެހެންމެ މިއާ ޚިލާފަށް، ދައްޖާލަކީ، ކަލާނގެ ކަމަށް ގަބޫލުކޮށް، އޭނާ އަށް އީމާންވެއްޖެ މީހަކު ވަގުތުން ސުވަރުގެ ވައްދާނެ އެވެ. އެކަމަކު އެއީ މަކަރުވެރި ކަމުގެ ތަނެކެވެ. ޙަޤީޤީ ސުވަރުގެ އެއް ނޫނެވެ. 

74 - މިތާ ޖަންނަތަށް ލެވުނު މީހަކު އެ ތާނގާ
               ހިތާމައިގެ ވެރި ނަރަކަޔަށް ލެއްވެވޭނޭ

ދައްޖާލުގެ މަކަރުވެރި ކަމަށް ހެއްލި އޭނާގެ ސުވަރުގެއަށް ވަން މީހުން ދަންނާށެވެ.  ޤިޔާމަތް ދުވަހު އެމީހުން ހިތާމައިން ފުރިގެންވާ ހަޤީޤީ ނަރަކަޔަށް ލެއްވޭހުއްޓެވެ. 

75 - މިތާ ނަރަކަޔަށް ވެއްދި މީހަކު އެދުވަހުން
              ހިތާ ހަށި ފުރޭ  ސުވަރުގޭޔަށް ދެވޭނޭ

ދައްޖާލަށް އީމާން ނުވުމުގެ ސަބަބުން އޭނާގެ ނަރަކަޔަށް ލެވުނު ކޮންމެ މީހަކު، ޤިޔާމަތް ދުވަހު، ނިޢުމަތްތަކުން ފުރިގެންވާ ރަޙްމަތުގެ ސުވަރުގެ އަށް ވެއްދޭހުއްޓެވެ. 

76 - އަރައިގެންެ މިދާ ފިތުނަ ކުރިޔަށް ހިނގާއިރު
                މަރައި  ދިރުވުމެއްވެސް  އެތާ ގެންގުޅޭނޭ 

ދައްޖާލުގެ މަކަރުވެރި ކަމުގެ ތެރޭގައި  މަރައި ދިރުވުމެއް ވެސް އޭނާ ގެންގުޅޭނެއެވެ. އޭނާގެ އިޝާރަތަށް ދިރިތިބީން މަރުވެ މަރުވެފައިވާ މީހުންނަށް ފުރާނަ އެޅިގެން އަލުން އައިސް މިފަދަ ކަންތައްތައް ވެސް ހިނގަމުންދާނެއެވެ. 

77 - އެ ފާސިދު ގެ ކަންތައް ދަށަށް ދާށަ ވީމާ
              ގެފާނުން ޚަޟިރު އެންމެ ފަހު ބޯ ކަނޑާނޭ

ދައްޖާލުގެ މި ފިތުނަވެރި އަމަލުތަކަށް ނިމުމެއް އަންނަން ވާހިނދު، އޭނާ ޚަޟިރުގެ ފާނުގެ އިސްތަށިފުޅު ކަނޑާނެއެވެ. އެކަލޭގެފާނު ޤަތުލުކޮށްލާނެއެވެ.

78 - މި ބޭކަލަކު ދިރުމުން އެކާފިރުގެ އެދުމަށް
               ތިބީންނަށް ކަލެއްކަމުގެ ވަހުމެއް އަރާނޭ

ދައްޖާލުގެ އިޝާރާތަށް އަލުން ޚަޟިރުގެފާނު ފުރާނަފުޅު އެޅިގެން ތެދުވެވަޑައިގަންނަވާނެއެވެ. ނަމަވެސް މިހާ ހިސާބަށް ދައްޖާލުގެ ކަންތައްތައް ދިޔުމުން، ދެން އެންމެންނަށް ވެސް، މީނާޔަކީ، ކަލަކު ކަމާމެދު ޝައްކު އުފެދި ވަހުމުތައް ގިނަވެދާނެއެވެ.

79 - ހިޔަންޏަށް މި މުޑި ނެގި ކަލޯ ކުޅަކަމެއްގާ
                މިޔަށް ފަހަކު ދެން ކާމިޔާބެއް ނުވާނޭ

މި ބޮޑާ ކަލޭގެ ކުރާ އެއްވެސް ކަމެއްގައި މި ޔަށް ފަހު ދެނެއް ކާމިޔާބެއް ނުވާނެއެވެ. ''ކަރާމާތްތަކާއި މުޢުޖިޒާތްތައް'' ދެއްކުމުގެ ޤާބިލިއްޔަތު އެހިނދުން ފިލައިހިނގައިދާނެއެވެ. 

80 - މިޔާ އެންމެ ގިނައިން ތަބާ ވާން އުޅޭނީ 
             ލިޔާޤަތް ނުތެރި ބުއްދިދެރަ އަންހެނުންނޭ

ދައްޖާލަށް އީމާންވާ މީހުންގެ ތެރޭގައި ގިނަވާނީ ވިސްނުން ކޮށި އަންހެނުންނެވެ.

81- ތުނޑެއް ބިހުރައެއް ރީތި ހުތުރުގެ ތަފާތެއް 
              އުޑެއް އަދި ބުޑެއް ވަކި ނުވާ       ޖާހިލުންނޭ

ތަޢުލީމީ ގޮތުން އެއްވެސް ހޭލުންތެރިކަމެއް ނެތް މީހުންނެވެ. 
އުޑެއް ބުޑެއް ތުނޑެއް ބިހުރަ އެއް ވަކި ކުރާން ނޭނގޭ ފެންވަރުގެ ތަންދޮރު ނުދަންނަ ޖާހިލުން ނެވެ.

82- ނުވެސް ބަޔަކުނަށް  ތެދުވެވޭ ފަދަ މިހެންތިބި
              ދުވަސް ތިން އެ ދައްޖާލު    ދައްކައި ހަދާނޭ

މި ފަދަ މީހުންނަށް ދައްޖާލުގެ ''މޮޅުކަމާހުރެ'' ހައިރާންކަން ބޮޑުވެގެން ތެދުވެ ހަރަކާތްތެރިވާންވެސް ނޭނގޭ ފަދަ 3 ދުވަސް އޭނާ ކުރިމަތި ކުރާނެއެވެ.

83 - މަހެއް ހަތް ދުވަސް، ތިން ދުވަސް ދިގުމިނެއްގާ
                 ބަހެއް ޞައްޙަ އެދުވަހުގެ މިން ކަނޑަ އަޅާނޭ 

މި ދުވަސްތަކުގެ ދިގުކުރުމިން މިހާރުގެ ދުވާލެއްގެ ދިގުކުރުމިނާ ތަފާތުވާނެ އެވެ. އާދައިގެ ދުވަހަކަށްވުރެ ވަގުތު މާ ދިގުވާނެއެވެ.

84 - ގަޑިން ދަންފުޅިން ޛިކުރަކުން ފަދަވި ކަމަކުން 
                އަޑީ މިބުނި     ދުވަހުގެ    ވަގުތުތައް  ގުނާނޭ

އެކަމަކު ވަގުތުގެ އަސްލު ދިގުކުރު މިން ބެލެމުންދާނެ އެވެ.

85 - ޖަމާޢަތުގެ ހެޔޮ ވިސްނުމާ މިފަދަ  ކަމަކުން
              ނަމާދާއި     ރޯދައިގެ       ހަމަވެސް  ހިފާނޭ 

ހެޔޮ ގޮތުގައި ތިބި މީހުން މި މުއްދަތުގެ ތެރޭގައިވެސް އާދައިގެ އާންމު އުސޫލުން ވަގުތުތައް ދެނެގަނެގެން ނަމާދާއި ރޯދައިގެ އަޅުކަންވެސް އަދާ ކުރަމުން ދާނެ އެވެ.

86 - މި ކަންކަން މިހެން އުނގެނިގެން ދެނިތިބިއްޔާ
                 ނިކަން ރަނގަޅު ކަމަކަށް އެދުވަހުން ވެދާނޭ

އިސްވެ ދެންނެވުނު ކަންކަން މި މަގުން ދަސްކޮށް އުނގެނިގެން ތިބިއްޔާ  ދައްޖާލު އަރާ ދުވަހު މި ކަމުގެ ފައިދާ އެބަޔަކަށް  ކުރާނެއެވެ.

               ފޮތް ނުނިމޭ....

މިހާތަނަށް ހުށަހަޅާފައިވާ ޚިޔާލުގެ އަދަދު (2)

...
ލިޔުނީ ރިޔާޒު , 2009-01-08 19:33:25

ޤިޔާމަތުނާމާގެ އާ ބައެއްގެ ދޭހަ މި ލިބުނީ އެކަމަށް އިންތިޒާރު ކުރާތާ ވަރަށް ދުވަސް ފަހުން. މިއީ ވަރަށް ޝައުޤުވެރި ޅެމެއް. ލަސްނުވެ އަނެއްބައިވެސް ފެންނާނެ ކަމުގައި އުންމީދު ކުރަން.

...
ލިޔުނީ މަޙްމޫދު, 2011-12-09 14:33:25

މިޅެމުގެ އަނެއްބައި ނިކުންނާނެ ދުވަހެއްގެ އިންތިޒާރުގައި އެބަތިމީވެވެ. ވަރަށް އަވަހަށް ޝާއިޢު ކޮށްދެއްވާނެކަމަށް އުންމީދުކުރަމެވެ.

ޚިޔާލު ހުށަހަޅާ

ހުށަހަޅާ

ނަން

ޚިޔާލު ލިޔާބައި ކުޑަކުރޭ | ލިޔާބައި ބޮޑުކުރޭ

މަތިން ފެންނަ އަކުރުތަށް ހުރިގޮތަށް (އިގިރޭސިން) ލިއުއްވާ

ހުށަހެޅުމަށްޓަކައި މަތިން ވާތްފަރާތުގައިވާ "ހުށަހަޅާ" ބަޓްން ބޭނުންކުރަށްވާ