ޢަބްދުލްމުޢީދު ޙަސަން

1.
ގޮދަންފުށް އެއީ ރޮށި ފިހާ އެއްޗެކޭ،
             ތެދަށް ބުނަމެ ގުޅަވެސް ހަދާ އެއްޗެކޭ.

2.
އެއިން ގުޅަވަށައިގެން އެއަށް މަސް އަޅައި،
             އެއިން މަސް އެ ފަތަފޮޅި ހަދާ އެއްޗެކޭ.

3.
ބުނަން ޕީޓުރަލް ގައި ހުރޭ ޑިސްކުތައް،
             ގުނަން ވެސް އެއީ ޢަދަދު ގިނަ އެއްޗެކޭ.

4.
ހަދާނޭ އެއިން ކީމިޔާ ބިސް އަޅައި،
             ހަނދާނެއް ނުކާ ވެސް ނުވާ އެއްޗެކޭ.

5.
ފިހާރައިން ކިރައިގެން ކިލޯ ވިއްކިޔަސް،
             އަނހާށޭ! ލެމާޝްގައި ވި މޮޅު އެއްޗެކޭ.

6.
ސިޓިން ރޫމުގައި ތިބެ މޮޑޭނަމަ އިނގޭ،
             ސިޓިން ރޫމުތެރެއަށް ބުރާ އެއްޗެކޭ.

7.
އެއިން މީރު ކާނާ ހަދައިގެން ކެވޭ،
             އެއިން ބަނޑު ފުރާ ކާލެވޭ އެއްޗެކޭ.

މަތީގައި އެވާ ފޮޅުވަތްތަކަށް ކިޔާނީ ކީކޭތޯއެވެ؟ އެބާވަތުގެ ފޮޅުވަތްތައް ލިޔަން ކިލާހުގައި އަޅުގަނޑަށް ދަސްވިއެވެ. އޭރު އެނގު ގޮތުގައި، ޅެމަކީ އެގޮތަށް ލިޔެލާ ފޮޅުވަތްތަކެކެވެ. އޭގައި ވަޒަނެއް ވެއެވެ. އަދި ބަނޑުވަށް އަކުރަކާއި ކާފިޔާއެއް ވެއެވެ. ސުއާލަކީ، މި ކަންތައްތައް ފުރިހަމަވާ ކޮންމެ ފޮޅުވަތްތަކެއް ޅެމަކަށް ވެދާނެތޯއެވެ؟

ނަންގަނެވިދިޔަ ގޮތަށް ޅެން ހަދަން ދަސްވުމުން، ޅެމެއް ހަދާހިތްވިއެވެ. އެކަން ކުރުމަށް، ޝައުޤުވެރިވިލެއް ބޮޑުކަމުން، ހިތަށް އެރި އެއްޗެއް ޤަލަމުގެ ތުނޑާ ހަމައަށް އައީ، "ބާރަކާ މީހަކުގެ ނުމެލާ އާރަކަށް މާމުއި" ފެތޭހެން، ވަޒަނަށް ފެތިގެންނެވެ. އެގޮތުން ހެދި ޅެމުގެ ފުރަތަމަ ބައިތު ފެށީ: "ރިޒުޤުގެ ޚަޒާނާ ކަނޑުތަކަށް، ފުރަމޭ ނަމާދު ފަތިސް ފަހުން،" މިހެންނެވެ. ޅެން ހެދުމަށްފަހު، މިތުރުންނަށް ދައްކާލީމެވެ. އެންމެން ވެސް ބުނީ ވަރަށް ކަމުދާ ކަމަށެވެ. ދެން މަޝްހޫރު މަޖައްލާއެއްގައި ޅެން ޝާއިޢުކުރީމެވެ. އެއީ، ވަރަށް ގިނަ ބަޔަކަށް ކަމުދިޔަ ޅެމެއް ކަމުގައިވިއެވެ.

އޭގެ އަހަރުތަކެއް ފަހުން، އަޅުގަނޑަށް އެނގުނު ގޮތުގައި، ޅެމަކީ، ހަމައެކަނި ވަޒަނަކާއި ބަނޑުވަށް އަކުރަކާއި ކާފިޔާއެއް ނޫނެވެ. އެކަމަކު، އެނޫން ބައިތައް އޭގައި ހިމެނެއެވެ.

ޅެމުގައި ޚިޔާލާއި ފިކުރާއި ފަލްސަފާ ވެއެވެ. ބޭރުފުށުން ފެންނަ މާނައަކާއި އެތެރޭގައި ފޮރުވިފައިވާ މާނަތަކެއް ވެއެވެ. ޅެމުގެ ޙިކުމަތަކީ، ހަރުބަސްތަކެއް ވަކި ވަޒަނަކަށް ފައްތާލުމެއް ނޫނެވެ. އެކަމަކު، ޅެމުގެ ޙިކުމަތަކީ، މަލެއް ފޮޅެމުންދާއިރު، ޅެންވެރިޔާ އެއިން ނެރެދޭ ޙިކުމަތެވެ. ވާހަކަ ނުދައްކާ ތަކެތި ލައްވާ ވާހަކަ ދައްކުވަން އޭނާ ދަންނާނެއެވެ.

މިއީ، ވަރަށް ދިގުކޮށް ލިޔެވިދާނެ މައުޟޫޢެކެވެ. ނަމަވެސް މިވަގުތު މިހިސާބަށް ކުރުކޮށްލާނަމެވެ.

މިހާތަނަށް ހުށަހަޅާފައިވާ ޚިޔާލުގެ އަދަދު (2)

...
ލިޔުނީ ސަލާހް, 2009-06-21 15:33:06

މި ލިޔުން ކުރުކޮއްލީތީވެ ވަރަށް ހިތާމަ ކުރާހާލު ދަންނަވަމެވެ!
އަޅުގަނޑަކީވެސް ދިވެހިބަހުން ޅެންހަދަން ބޭނުންވާ ކުއްޖަކީމެވެ! އެއްވެސް މައުލޫމާތެއް މައުލޫމާތު އެއް ނުލިބި ލިއުން ނިމުނީއެވެ! ޔަގީނުންވެސް އުސްތާޛު މުއީދުގެ ކިބައިގައި (ޅެންވެރިޔާގެ ބަނޑުގައި) ފޮރުވިފައިވާ މާނައެއްވެ އެވެ!!

...
ލިޔުނީ އަބަންބަދީ, 2009-06-22 09:45:28

މަތީގައި އޮތް ޅެން ކިޔަން ފަށާފައި އަޅުގަނޑު މި ހިތަށް އެރީ މުޢީދު ފަދަ ބޭފުޅަކު ހައްދަވާނެ ޅެމެއްބާއޭ މިއީ. އެހެން ހީކޮށް ހިސާބަކަށް ނުރުހުންވެސް ވެ ހުރެ، ލިޔުން ނިއްވާލީ ފުރަތަމަ. ދެން އަނެއްކާ އަލުން މި ކިޔާލީ. ތިރީގައި ލިޔުއްވާފައިވާ ބަޔާ އެކު. ދެން އަދި މި ވިސްނުނީ މުޢީދުގެ މަޤްޞަދު.
އެހެންވީމާ އަޅުގަނޑު މި ހިތަށް އަރަނީ ހާދަ މަދޭ މިފަދަ މުހިއްމު ލިޔުމަކަށް ލިބިފައި މިހިރަ ކޮމެންޓުގެ ޢަދަދު. ފަހަރެއްގައި އަޅުގަނޑަށް ފުރަތަމަ ދިމާވި ގޮތަށް، ދެ ބައިތެއްވަރު ކިޔާލުމަށް ފަހު އެހެން ގިނަ ބަޔަކު ވެސް ނިއްވާލީ ކަމަށް ވުންވެސް އެކަށީގެންވޭ. ކޮންމެ ގޮތެއް ވިޔަސް، މުޢީދު ތިޔަ ވިދާޅުވީ ހަމަ ވަރަށް ރަނގަޅު ވާހަކައެއް. ދިވެހި ބަހުން ޅެން ހަދާ ވަރަށް ގިނަ މީހުން އެބަ އުޅޭ. ހަމަ ގޮދަން ފުށަށް ތިޔަ ހެއްދެވިކަހަލަ ޅެންތައް އިނގޭތޯ. ދިވެހި ޅެންވެރިކަން ކުރިއަރުވައި، ޅެންވެރިކަމާ މެދު ދިވެހިން ލޯހުޅުވައި އެކަމަށް ޝައުޤުވެރިކުރުވުމަށް މުޢީދު ތިޔަ މަސައްކަތްކުރައްވާ ގޮތަށް މަސައްކަތްކުރައްވާ އެހެން ބޭފުޅެއް އަޅުގަނޑު ނުދެކެން. މިދެންނެވީ، ޅެންވެރިކަމުގެ ޚިޔާލަކީ ކޮބައިކަން މީހުންނަށް ވިސްނައިދެއްވުމަށް ތިޔަ ކުރައްވާ މަސައްކަތްތައް. ޚައްޔާމުގެ ރުބާޢިއްޔާތު ފަދަ ދުނިޔެއަށް މަޝްހުރު ޅެންތައް ތަރުޖަމާކުރެއްވުމުން ވެސް އެފަދަ ޅެންވެރި ޚިޔާލަކީ ކޮބައިކަން ޅެމަށް ޝައުޤުވެރިވާ ބޭފުޅުންނަށް އެނގިވަޑައިގަންނަވާނެ. އަޅުގަނޑު ހިތަށް އަރާ، މުޢީދުގެ ނަޒަރުގައި ދިވެހިބަހުން ހެދިފައި ހުރި ޅެންވެރި ޚިޔާލުގެ ބައެއް ޅެންޅެމުގެ މިސާލާއި އެ ޅެންތަކުގެ ޚިޔާލު ރީތިވީ ކީއްވެކަން އެނގޭނެ ފަދަ ބައެއް ލިޔުން ވެސް މުޢީދު ލިޔުއްވާނެ ނަމައޭ.

ޚިޔާލު ހުށަހަޅާ

ހުށަހަޅާ

ނަން

ޚިޔާލު ލިޔާބައި ކުޑަކުރޭ | ލިޔާބައި ބޮޑުކުރޭ

މަތިން ފެންނަ އަކުރުތަށް ހުރިގޮތަށް (އިގިރޭސިން) ލިއުއްވާ

ހުށަހެޅުމަށްޓަކައި މަތިން ވާތްފަރާތުގައިވާ "ހުށަހަޅާ" ބަޓްން ބޭނުންކުރަށްވާ