ދިވެހި ބަހަށް ތަރުޖަމާކުރީ: ޢަބްދުލްމުޢީދު ޙަސަން

1. ޝަރާބުގެ އާރަކުން ސާޤީ މަށަށް ކޫޒެއް އަޅައި ދެއްޗޭ!
                 އެއަށްވާ ޝައުޤަކުން ވަޖިދުވެ މަވީތީ ލަސްނުކޮށް ދެއްޗޭ!

2. އިހަށް ކައިރީގަވީ ޢިޝްޤީގެ މަންޒިލު މާދުރަށް ދިއުމުން،
                 ހިތަށް މިލިބުނު ތަދަށް ފަރުވާ، ތަފާތެއް ނެތި މަށަށް ދެއްޗޭ!

3. ޖެހޭ ހެނދުނުގެ ނަޔާ ވައިރޯޅިޔާ އެކުގައި ޚަބަރު އައުމަށް،
                 އަދައި އުންމީދުތައް ކުރި ބީވުމުން ފިޔަވަޅު އެޅޭ ކައްޗޭ!

4. "މަޖޫސީ ޝޭޚު" ދަނެޔޭ ތެދުމަގާ ދުނިޔޭގެ ހަމަ ލަމަތައް،
                 ހަޖޫ ނުކިޔާ، ބުނެފިނަމަ، "ޖާމަކުން" ތަޤުޥާ ފަވާލައްޗޭ!

5. އުދާހުގެ ފުން ކަނޑެއްގެ ތެރޭ، ނަގާ ހޮޅި ރާޅުތަކުގެ ތެރޭ،
                 މިދާހާ ރޭތަކެއް ދާއިރު، ޢިތާބުގެ ހިލަ ނުއެއްލައްޗޭ!

6. އަމާން ބައްރުގެ މަތީ ދާއިރު، އަޅާ ދުރުމިން ނުފެންނަންޏާ،
                 ޔަޤީން ކޮށްލަން އައިސް ކައިރިން މަގޭ ޙާލަތު ބަލައިލައްޗޭ!

7. ހަވާނަފުސަށް ތަބާވެވުމުން، މަގޭ ބަދުނާމުވީ ޝުހުރަތު،
                 ނިވާކޮށްލަން ހިތައި އުޅުނަސް، މަޙާފިލުގައި މިކަން ދައްޗޭ!

8. އެދޭ ނަމަ ލޯބި ދަމަހައްޓާން، ޚިޔާލަށް ލޯބިވާ އައުމުން،
                 ދުރަށްލައި ޙާފިޡޭ މިދުނިޔެ މުޅިން އިހުމާލުކޮށްލައްޗޭ!!!

މިއީ ޙާފިޡުއްޝީރާޒީގެ ފުރަތަމަ ޣަޒަލެވެ. އޭނާގެ ޣަޒަލުތަކަކީ، އިންސާނުން މިދުނިޔޭގައި ދިރި ތިބިހާ ހިނދަކު، އާކަންމަތީ ދެމިގެންވާނެ ޅެންތަކެއް ކަމުގައި ބުނެވެއެވެ. ޙަޤީޤަތުގައި މިއީ ޞޫފި ޣަޒަލުތަކެކެވެ. މީގައިވާ ބަސްތަކުގައި އެވަނީ އެއިން ދޭހަވާ ލަފުޒީ މާނަތަކެއް ނޫނެވެ. އެކަމަކު އޭގެ ފަހަތުގައި ފޮރުވިފައިވާ ޞޫފި މާނަތަކެއް ވެއެވެ. ރީތިކަމާއި ޗާލޫކަން ވަނީ އެ މާނަތަކުގައެވެ.

މިސާލަކަށް: ހަތަރުވަނަ ބައިތުގެ ޞަދުރުގައިވާ "މަޖޫސީ ޝޭޚު" ގެ މާނައަކީ ކޮބައިތޯއެވެ؟ ޞޫފީންގެ ބަހުގައި މަޖޫސީ ޝޭޚަކީ، ޞޫފީންގެ އިމާމެވެ. އެ ބައިތުގެ ޢަޖުޒުގައިވާ "ޖާމަކީ" ޝަރުބަތް ތަށްޓެއް ނޫނެވެ. އެކަމަކު އެއީ، އަޅުކަމާއި ހެޔޮ ޢަމަލެވެ.

ޞޫފި މާނައިން މާނަކުރިޔަސް، ލަފުޒީ މާނައިން މާނަކުރިޔަސް، ޙާފިޒުގެ ޣަޒަލުތަކަކީ، ރިވެތި މުތީތަކަކުން އަމުނާލެވިފައިވާ ޖާދޫގެ ހާރުތަކެކެވެ. އެހެން ޅެންތަކުގައި ނުވާ ޖަޒުބާތެއް މި ޣަޒަލުތަކުގައި ވެއެވެ. އެއް ބަޔަކަށް މި ޅެންތަކަކީ، ލޯބީގެ ލަވަތަކެކެވެ. ނަމަވެސް އަނެއް ބަޔަކު މިއާމެދު ދެކެނީ، ޚުޝޫޢަތްތެރިކަމާއެކު، މާތްﷲގެ ޙަޟުރަތަށް ދެންނެވޭ ތަޢުރީފާއި ސަނާތަކެއް ކަމުގައެވެ.

މި ޣަޒަލުތަކުގައި، ޙާފިޡުގެ ލޯބިވެރިޔަކީ މާތްﷲ އެވެ. ލޯބިވެރިޔާގެ މަތިން ހަނދާންވާ ހިނދު، ދުނިޔެއާއި ދުނިޔޭގައިވާހައި އެއްޗެއް ދޫކޮށް އެތަކެތި އިހުމާލުކޮށްލަން ގޮވާލަނީ އެހެންވެގެންނެވެ.

މާތްﷲގެ ވާގިފުޅާއެކު، އެހެން ފަހަރަކުން، ޙާފިޡާއި އޭނާގެ ޣަޒަލުތަކާބެހޭ ގޮތުން، މަޒުމޫނެއް ލިޔެވޭތޯ ބަލާނަމެވެ. އެފަދަ މަޒުމޫނެއްގައި ނޫނީ، މިކަންކަން ސާފުކޮށް ބަޔާންކޮށް ނުދެވޭނެއެވެ.

މިހާތަނަށް ހުށަހަޅާފައިވާ ޚިޔާލުގެ އަދަދު (2)

...
ލިޔުނީ އުސްމާން, 2008-11-27 09:03:55

މިއީ ޙާފިޡުއްޝީރާޒީގެ ފުރަތަމަ ޣަޒަލެވެ. އޭނާގެ ޣަޒަލުތަކަކީ، އިންސާނުން މިދުނިޔޭގައި ދިރި ތިބިހާ ހިނދަކު، އާކަންމަތީ ދެމިގެންވާނެ ޅެންތަކެއް ކަމުގައި ބުނެވެއެވެ. ޙަޤީޤަތުގައި މިއީ ޞޫފި ޣަޒަލުތަކެކެވެ. މީގައިވާ ބަސްތަކުގައި އެވަނީ އެއިން ދޭހަވާ ލަފުޒީ މާނަތަކެއް ނޫނެވެ. އެކަމަކު އޭގެ ފަހަތުގައި ފޮރުވިފައިވާ ޞޫފި މާނަތަކެއް ވެއެވެ. ރީތިކަމާއި ޗާލޫކަން ވަނީ އެ މާނަތަކުގައެވެ.

...
ލިޔުނީ ad, 2009-05-11 12:10:51

muweeduge liyunthah arimathin nufen naathee varah derave
editor mikamaa samaalu kan dehvaane nama

ޚިޔާލު ހުށަހަޅާ

ހުށަހަޅާ

ނަން

ޚިޔާލު ލިޔާބައި ކުޑަކުރޭ | ލިޔާބައި ބޮޑުކުރޭ

މަތިން ފެންނަ އަކުރުތަށް ހުރިގޮތަށް (އިގިރޭސިން) ލިއުއްވާ

ހުށަހެޅުމަށްޓަކައި މަތިން ވާތްފަރާތުގައިވާ "ހުށަހަޅާ" ބަޓްން ބޭނުންކުރަށްވާ