މަޖުބޫރު ލޯބި (42)

ގައްދޫ މުޙަންމަދު ރަޝީދު

އޭނާ ރަގަބީލަށް އޮބާލިއެވެ.

ދެވަނަ ހިނދުކޮޅުގެ ތެރޭގައި ފިޔަވަޅުގެ އަޑު އިވެން ފަށައިފިއެވެ. ފުންނާބު އުސްކުރި ފައިވާނުގެ ޓަކްޓަކް އަޑެވެ. އަދި މެދު ޢުމުރުގެ ސަމައްތަރު ހެޔޮ އަންހެނަކު ދޮރުހުޅުވާ ލައިފިއެވެ.

ޖަޔާ ފެނިފައި އޭނާ ޙައިރާން ވެއްޖެއެވެ. ދެން ހިނިތުން ވެލާފައި އުފާ ފާޅުކުރިއެވެ.

[ތިޔައީ މިސިޒް ޖަލާލީކަން ހަމަ ޔަޤީނެވެ.] އޭނާ އިސްތިޤްބާލު ކުރަމުން ބުންޏެވެ.

[ލައްބައެވެ.] ޖަޔާ ސިހިފައި ބުންޏެވެ. [އަޅުގަނޑުގެ ނަމަކީ ނާޖިޔާއެވެ.]

[މިސްލޫސީ...] އެ އަންހެން މީހާ ނަން ބުނެދިނެވެ. ދެން ނާޖިޔާ ގާތުގައި އެތެރެއަށް ވަންނަން ބުނެފިއެވެ.

ބައްދަލުކުރާ ކޮޓަރީގައި ހުރި ރީތި ސޯފާއެއްގައި ނާޖިޔާ ބައިންދަމުން މިސް ލޫސީ ބުންޏެވެ. [މިގޭގައި އުޅެނީ އަޅުގަނޑާ އަޅުގަނޑުގެ ދައްތައެވެ. އަޅުގަނޑު އޭނާވެސް ތަޢާރަފް ކޮށްދޭނަމެވެ. މިސިޒް ޖަލާލީއާ ބައްދަލުވުމުން ވަރަށް އުފާވެއްޖެއެވެ. އަޅުގަނޑުމެން ތިޔަގެއަށް ދާންވެސް އެބަވިސްނަމެވެ.]
އޭނާގެ ދައްތަވެސް އަތުވެއްޖެއެވެ. މަސްފަލަ އަންހެނެކެވެ. އުފާވެރި މިޒާޖެކެވެ. އޭނާ ޖޯޝާއެކު ނާޖިޔާއާ ބައްދަލުކުރިއެވެ.

[ވަރަށް ރީއްޗެވެ.] އޭނާ ބުންޏެވެ. [ތިޔަ ހެދުންވެސް ވަރަށް ރީއްޗެވެ.]

[ޝުކުރިއްޔާއެވެ!]

[އަޅުގަނޑު ތިޔަހެދުން ލައިފިއްޔާ ހުންނާނީ ކިހިނެއްތޯއެވެ؟] އޭނާ ހީނގަތެވެ.

[ވަރަށް ރީތިވާނެއެވެ.] ޖަޔާ މިހެން ބުނުމުން އޭނާ ބާރަށް ހޭން ފަށައިފިއެވެ.

ދެން ނާޖިޔާއާ ވަރަށްބޮޑަށް ގުޅާލައިފިއެވެ. ފަލަ އަންހެންމީހާ ޖަޔާގެ ދޯޕައްޓާވެސް އެޅީއެވެ. ޖަޔާ ވަރަށް ލަދުވެސް ގަތެވެ. މިސް ލޫސީ ސައިގެނެސް ދިނެވެ.

އެގޭގައި ދެގަޑިއިރު ވޭތުވެގެން ހިނގައްޖެއެވެ. އެމީހުން ޖަޔާއަށް މުޅިގެ ދެއްކިއެވެ. އަމިއްލަ ކަންތައްތަކާބެހޭ މަޢުލޫމާތު ދިނެވެ. ރީތި އެއްޗެއްސާ ހުތުރު އެއްޗެހި ބުނެދިނެވެ.

އެމީހުން ޖަޔާގެ ގާތުންވެސް އަމިއްލަ ވަޠަނާ ގެއާ އަދި ކާވެންޏާ ބެހޭގޮތުން ސުވާލުތައް ކުރިއެވެ.

[ކުރީގައިވެސް ޖަލާލީ ދެނެލައްވަމުތޯއެވެ.] ލޫސީ ބުންޏެވެ.

[ނުދަންނަމެވެ.]

[ނުވެސް ދެކެމުތޯއެވެ؟]

[ލައްބައެވެ.]

ދެބޭން ޙައިރާން ވެއްޖެއެވެ. މިސް ލޫސީ ބުންޏެވެ. [އެންމެ ފުރަތަމަ ޖަލާލީ ދެކެލެއްވި ދުވަހު ޝޮކެއް ލިބި ލައްވާނެ ކަންނޭގެއެވެ. އޭނާއާ އަޅާބަލާއިރު ކަލާ ވަރަށް ރީއްޗެވެ.]

މި މައުޟޫޢުގެ ތެރެއަށް ވަންނާކަށް ޖަޔާ ބޭނުމެއް ނުވެއެވެ. އެކަމަކު ޖަވާބުދޭން ޖެހޭނެތާއެވެ.

[އަޅުގަނޑުމެންގެ ތެރޭގައި ކާވެނިކޮށް އުޅެނީ މިގޮތަށެވެ. މީހާގެ ސިފައަށްވުރެ ބޮޑަށް ބަލަނީ އަޚްލާޤާ ސްކޫލެވެ.]

[އެހެންތޯއެވެ. އެހެންވިއްޔާ ކަލާ ތިޔަހުންނެވީ ޖަލާލީއާމެދު ހިތްހަމަ ޖެހިލައްވައިގެން ތާއެވެ. އޭނާއަކީ ވަރަށް ރަނގަޅު މީހެކެވެ. ހިތްހެޔޮ އަދި ރީތި އަޚްލާޤު ލިބިފައިވާ އިންސާނެކެވެ.]

އެމީހުންގެ ދުލުންވެސް ޖަލާލީގެ ތަޢުރީފު ޖަޔާ އަޑު އަހައިފިއެވެ. ހިތަށް ކުޑަ ހަމަޖެހުމެއްވެސް ލިބިއްޖެއެވެ. މިހާރު ޖަލާލީގެ ސިފައާމެދު އޭނާގެ އެއްވެސް ޝަކްވާއެއް ނެތް ކަހަލައެވެ. ކުރީގައި ވޭތުވެގެން އެދިޔައީ ވަގުތު އަދި ޖަޒްބާތު މަރްޙަލާއެކެވެ. މިހާރު އޭނާއާއެކު ދުވަސްކޮޅެއް ވޭތު ކުރެވިއްޖެވެސް މެއެވެ.

ނާޖިޔާ ދާން ތެދުވެއްޖެއެވެ.

[އެކަނި އިންނަން ޖެހުމުން ވަރަށް ފޫހިވެއެވެ. ރުހިލައްވާ ކަމެއް ކަމުގައި ވަންޏާ މިގެއަށް މަދުމަދުން އައިސް އުޅެން އަޅުގަނޑު ގަސްތުކުރަމެވެ.] ޖަޔާ މަޑުމަޑުން ބުންޏެވެ.

[ވަރަށް ރަނގަޅެވެ. އަޅުގަނޑު މެންނަކީ ރަނގަޅު ރަޙްމަތްތެރިން ނީމުއެވެ. އަޅުގަނޑުމެންވެސް ތިޔަގެއަށް ދާނަމެވެ. މިސްޓަރ ޖަލާލީއަކީ ޗެސްކުޅުމުގެ މާހިރެކެވެ. އަޅުގަނޑުމެން ބައެއް ފަހަރު ޗެސްކުޅެ އުޅެމުއެވެ. ނާޖިޔާ ޗެސްކުޅެން ދެނެލައްވަމު ތޯއެވެ؟]

[ނުދަންނަމެވެ.]

[މިސްޓަރ ޖަލާލީ ދަސްކޮށް ދެއްވަފާނެއެވެ.]

[ދަސްކުރަން މަސައްކަތް ކުރާނަމެވެ.]

[ވަރަށް ރަނގަޅެވެ.]

އެދެމީހުން ޖަޔާއާއެކު ދޮރާއްޓާ ހަމައަށް އައެވެ. މިސް ލޫސީ ހުރީ ނާޖިޔާގެ ހެދުމަށް ނަޒަރު ހުއްޓިފައެވެ. ޚުދާ ޙާފިޡް ކިއުމުގެ ކުރީގައި އޭނާ ބުންޏެވެ. [އަޅުގަނޑަށްވެސް ތިޔަކަހަލަ ހިމަތޮޅި ހަށިގަނޑެއް ލިބިފައިވީނަމަ ތިޔަހެދުން ލާފައި ބަލާލީމުހެވެ.]

[ވަރަށް ރީތިދޯއެވެ.]

[ލައްބައެވެ.]

[މިކަހަލަ ހެދުމެއް ފަހާ ދެންތޯއެވެ.]

[ނޫނެކެވެ. ޝުކުރިއްޔާއެވެ.]

ޖަޔާ އެމީހުންނާއި ވަކިވެގެން އައިއިރު ވަރަށްބޮޑަށް ރަޙްމަތްތެރިކަން އާލާ ވެއްޖެއެވެ. އޭނާ ވަގުތު ހޭދަ ކޮށްލުމަށްޓަކައި މަގެއް ހޯދައިފިއެވެ. މާދަމާ ދާނީ އެހެން ދިމާއަކަށެވެ.

އޭނާ ނާނާ ކިޔަމުން ގެއަށް ވަދެއްޖެއެވެ. އަވަށްޓެރި ބަޔަކާ ބައްދަލުވުމުން އޭނާ ވަރަށް އުފާވެއްޖެއެވެ. ނާޖިޔާ ގެއަށްވަނުމާއެކު ދޯޕައްޓާ ނަގާ ސޯފާގައި ބާއްވައިފިއެވެ. އަދި ލިވިންގރޫމަށް އައިސް ފޮތެއް ނަގައިގެން ބަލަން ފަށައިފިއެވެ. ދެން މިއުޒިކް ރޯލެއްނަގާ ލަވަޖަހާ ސެޓަށް ލައްވާލިއެވެ. އިވެންފެށި ރީތި ރާގާއެކު ފައިން ރާގު ހަމަކުރަމުން ފޮތްބަލަން ފަށައިފިއެވެ.

********************

[ތިޔައައީ ކޮންތާކުން ހެއްޔެވެ؟]

އެއީ ޖަލާލީގެ އަޑެވެ. އަޑުގައި ކުޑަ ހަމަނުޖެހުމެއް އެކުލެވިފައިވެއެވެ. އޭނާ އައި އިރެއް ޖަޔާއަކަށް ނޭގެއެވެ. ކޮޓަރިތެރެ މިއުޒިކުގެ އަޑުން ގުގުމާލައިފިއެވެ. އޭނާ އިނީ ފޮތުގެ ތެރެއަށް ގެއްލިފައެވެ.

އެހެންކަމުން ކާރުގެ އަޑު ނީވުނީ ކަމުގައި ވެދާނެއެވެ. އަދި ޖަލާލީ އެތެރެއަށް ވަންކަންވެސް ނޭގުނީއެވެ. އޭނާ ހުރީ ޖަޔާ އިށީނދެގެން އިން ސޯފާގެ ފުރަގަހު ގައެވެ.

ޖަޔާ ތެޅިގެންފައި އެއްފަރާތެއްގައި ފޮތް ބާއްވައިފިއެވެ. އަދި އެނބުރިލާފައި ފުރަގަހަށް ބަލާލިއެވެ. ޖަލާލީ ވަރަށް ކައިރީގައި ހުއްޓެވެ.

އޭނާ ކުއްލިއަކަށް ތެދުވެއްޖެއެވެ. އަދި ބޭއިޚްތިޔާރުގައި ކިޔަން ގެންގުޅުނު ފޮތްނަގާ މޭމަތި ނިވާކޮށްލިއެވެ.
އެވަގުތު ދޯޕައްޓާ އަތުޖެހޭ ހިސާބަކު ނެތެވެ. އަދި ސުވާލުގެ ލޮލަކުން ބަލާލިއެވެ.

[ތިޔައައީ ކޮންތާކަށް ގޮސްފައި ހެއްޔެވެ؟] އޭނާ ހުރީ ޖަޔާގެ ރީތިކަމުގެ އާގޮތް ފެނިފައި ޙައިރާން ވެފައެވެ.

[ކިހިނެއްވީ ތޯއެވެ؟] އޭނާ އަވަހަށް ބުންޏެވެ.

[އަހަރެން ތިންފަހަރު މަތިން ނާޖިޔާއަށް ފޯނުކުރީމެވެ. ރިންގްވެއެވެ. އެކަމަކު ފޯނެއް ނުނަގައެވެ.]

[ކަމެއް އޮތީތޯއެވެ.] ޖަޔާ އަނެއް ފަރާތަށް މޫނު އަނބުރާލިއެވެ.

[އާއެކެވެ؟] ޖަލާލީ މަޑުމަޑުން ބުންޏެވެ.

[ކޮންކަމެއް ތޯއެވެ؟] ޖަޔާ އެނބުރިލާފައި ބުންޏެވެ. އޭނާ ދޯޕައްޓާއާ ދިމާއަށް މަޑުމަޑުން ޖެހެމުން ދިޔައެވެ. ޖަލާލީ ފުރަގަހުގައި ހުރެގެން އޭނާގެ ކަޅު އިސްތަށިގަނޑަށް ބަލަމުން ދިޔައެވެ.

[ހެނދުނު އަހަންނަށް ދެވުނީ ބުނެވެސް ނުލައެވެ.....] ޖަލާލީ ޢުޒުރުވެރި އަޑަކުން ބުންޏެވެ.

]އޭގެ ބޭނުމަކީ ކޮބައިތޯއެވެ.] ޖަޔާގެ އަޑުގައި ދިލަ އެކުލެވިފައިވެއެވެ.

[ބޭނުމެއް ނެތްކަމުގައި ވިޔަސް އެއީ ރީތިކަމެއް ނޫން ހެއްޔެވެ. އަޚްލާޤީ ފަރުޟެއްނޫން ހެއްޔެވެ.] ޖަލާލީ ބުންޏެވެ. [އަހަރެން ދިޔައިރު ޖަޔާ އޮތީ ނިދާފައެވެ.]

[ލައްބައެވެ. ރޭގައި ޖަލާލީ ދުރުވިއިރުވެސް އަޅުގަނޑު އޮތީ ނިދާފައެވެ. ހެނދުނު އޮފީހަށް ދުރުވި އިރުވެސް އޮތީ ނިދާފައެވެ.] ނާޖިޔާ ފާޅުގައި މަލާމާތް ކޮށްލިއެވެ. އަދި ދޯޕައްޓާ ނަގާ ކޮނޑުގައި އަޅުވާލިއެވެ.
ޖަލާލީގެ ހިތުގައި ހިނދުކޮޅަކަށް އުފާވެރިކަމުގެ ބައްތި ދިއްލުނެވެ. [އަނެއްކާ ރޭގައި ޖަޔާ އިނީ އަހަރެންގެ އިންތިޒާރުގައި ނޫން ބާވައެވެ.]

އެކަމަކު.........

އެ އުފާވެރިކަން އޭނާ ހިތުތެރޭން ނެރެލިއެވެ. އޭނާއާ ދޭތެރޭ އެހާ ނިކަމެތިކޮށް ކަންތައްކޮށް އޭނާ ދެކެ ބިރުގަންނަ އަންހެނަކު އިންތިޒާރުގެ ގަޑިތައް ގުނަންވީ ކީއްކުރަން ހެއްޔެވެ؟

[އަހަރެން މިއައީ ހަމައެކަނި ފޯނު ނުނެގީ ކީއްވެގެންތޯ ބަލާލަން ވެގެންނެވެ.] އޭނާ ދާން ހިނގައި ގަންނަމުން ބުންޏެވެ. [އަހަރެން ހުރިހާ ނަމްބަރަކަށްވެސް ފޯނު ކުރީމެވެ. މިއައީ ވަރަށް ކަންބޮޑުވެ ހުރެގެންނެވެ.]

[ގައިދީ ފިލައިގެން ދިޔައީ ކަމުގައި ހީވެލެއްވީ ތޯއެވެ؟] ޖަޔާ އެނބުރިލާފައި ހަރުކަށި ގޮތަކަށް ބުންޏެވެ.
ޖަލާލީ ހިނދުކޮޅަކު ހިމޭނުން ހުއްޓެވެ. ދެން ބުންޏެވެ. [ވަރަށް ލަދުވެތިވަމެވެ. އަހަރެން ގަސްތުގައި ރަށަށް ފޮނުވުމުގެ ކަންތައް ލަސްކުރަނީކީ ނޫނެވެ.]

ނާޖިޔާ މޫނު ކުނިކޮށްލިއެވެ.

[މިއަދު ފަހެއްޖަހާއިރު މިސް މެކް ޑޮނަލްޑް އަންނާނެއެވެ.]

ނާޖިޔާ އަނެއްކާވެސް ސުވާލުގެ ނަޒަރަކުން ބަލާލިއެވެ. ޖަލާލީގެ ލޮލަށް ބަލާލިއެވެ. ހަތަރުކަޅި ބައްދަލު ވެއްޖެއެވެ. އެކަމަކު ދެމީހުންގެ ހިތުގައިވާ ރުޅިވެރިކަމުގެ އަސަރަކަށް ކުޑަވެސް ލުޔެއް ނުލިބުނެވެ.
[ނާޖިޔާ އެކަނި އުޅެންޖެހޭތީ އަހަރެން މިސިޒް ހެރަލްޑްގެ މަގާމަށް މިސް މެކް ޑޮނަލްޑް ހަމަޖެއްސީއެވެ.]
[އަޅުގަނޑުގެ ފޫހިކަން ޚުދް އަޅުގަނޑު އަމިއްލައަށް ދުރުކޮށްފާނަމެވެ. އެއްވެސް މީހެއްގެ އެހީއެއް ބޭނުމެއް ނޫނެވެ.]

[އޭނާ ގޭތެރޭގެ ކަންތަކުގައި.......]

[އެއްވެސް ހެލްޕަރެއް ބޭނުމެއްނޫނެވެ..... އަޅުގަނޑުގެ އަތްފައި ސަލާމަތުން އެބަހުއްޓެވެ. އަޅުގަނޑަށް ހުރިހާ ކަމެއްވެސް ކުރެވިދާނެއެވެ.]

ނާޖިޔާގެ މިހަރުކަށި އަދި ނޭދެވޭ ބަސްތަކަށް ކެތްކުރަމުން ޙައިރާންކަމާއެކު ޖަލާލީ އޭނާއާ ދިމާއަށް ބަލާލިއެވެ. އެކައްޗެއްވެސް ނުވިސްނުނެވެ. މިސިޒް ހެރަލްޑްގެ މަޤާމަށް ދެވަނަ މީހަކު ގެންނަން އޭނާ އެއްބަސްނުވީ ކީއްވެގެން ކަމެއް ނޭގުނެވެ.

[އަހަނަންކީ އަމިއްލަ ކަންތައްވެސް ކުރެވޭވަރުގެ މީހެއް ނޫނެވެ.] ޖަލާލީ ހިނދުކޮޅަކު ހިމޭނުން ހުރުމަށްފަހު ބުންޏެވެ..... [މިސިޓް ހެރަލްޑް އަހަރެންގެ ހުރިހާ އާދަތަކެއް ހަލާކު ކޮށްފިއެވެ. އަހަރެންގެ ހުރިހާކަމެއް ކުރަނީ އޭނާއެވެ. އޭނާ ބާޒާރަށްދާ ކޮންމެ ދުވަހަކު އަހަރެންގެ އިންތިޒާމު ތަކަށް ބަދަލުގެނެއެވެ.

ޖަޔާ އަވަހަށް ބުންޏެވެ. [މިސިޒް ހެރަލްޑްގެ މަޤާމު އަޅުގަނޑަށްވެސް ފުރިދާނެއެވެ.]

ޖަލާލީ ކުއްލިއަކަށް އެނބުރި ބަލާލިއެވެ. [ހަމަ ރަނގަޅަށް ހެއްޔެވެ؟]

ޖަޔާ އެއްވެސް ޖަވާބެއް ނުދީ ކޮޓަރިއަށް ހިނގައްޖެއެވެ.

ޖަޔާގެ މިބަދަލާމެދު ޖަލާލީއަށް އެކައްޗެއްވެސް ނުވިސްނުނެވެ. ޙައިރާންވެގެން އޮފީސް ކޮޓަރިއަށް އަތުވެއްޖެއެވެ. ގޮނޑީގައި އިށީންނަމުން ސިގިރޭޓެއް ރޯކޮށްލިއެވެ. އަދި ވިސްނަމުން ދިޔަވަރަކަށް ހާސްވަމުން ދިޔައެވެ.

ޖަލާލީ އޮފީހަށް ފޯނުކޮށް މިސްޓަރ ހެޑްސަން ގާތުގައި މިސް މެކް ޑޮނަލްޑް ނުފޮނުވުމަށް ބުނެފިއެވެ. އެކަން ހަމަޖައްސީވެސް މިސްޓަރ ހެޑްސަނެވެ.

އޭނާ އަންނަން އޮތީ މިއަދު ހަވީރު ފަހެއްޖަހާ އިރަށެވެ.] ޖަލާލީ ބުންޏެވެ.

[ލައްބައެވެ.] ހެޑްސަން ބުންޏެވެ.

[އެކަމަކު ދެން އޭނާ ނުފޮނުވާށެވެ.]

[ކިހިނެއް ވީތޯއެވެ؟]

[މިވަގުތު ބޭނުން ނުވަނީއެވެ.] ޖަލާލީ ބުންޏެވެ.

[މިސިޒް ހެރަލްޑްވެސް ހުރީ ޗުއްޓީގައި ނޫންތޯއެވެ؟]

[އާނއެކެވެ.]

[ދެން ކިހިނެއް ވީތޯއެވެ؟]

[އަހަރެންގެ މިސްއަށް އިތުރު މީހެއްގެ ބޭނުމެއް ނުވެއެވެ.]

އަހަރެންގެ މިސިޒްއޭ ބުނިވަގުތު ޖަލާލީގެ ތުންފަތުގައި ވިހަ ހިނިތުންވުމެއް ދުވެލިއެވެ. އޭނާ ބުންޏެވެ.
 [ފަހުން ބޭނުން ވެއްޖެއްޔާ ގެންނާނީއެވެ. އޭނާ އެހެން ވަޒީފާއަކަށް ދިޔަނުދީ ހިފަހައްޓާށެވެ. މުސާރަ ބަރާބަރަށް ދޭނަމެވެ. މިއަދުން ފެށިގެން އޭނާގެ ވަޒީފާ ފެށުނީއެވެ.]

[ވަރަށް ރަނގަޅެވެ. ޖަލާލީއަށް ފެނިލައްވާ ގޮތެއް ހައްދަވާށެވެ.]

ޖަލާލީ ފޯނު ބާއްވައިފިއެވެ. ދެން ފައިލްނަގާ ކުރިމަތީގައި ބާއްވާލިއެވެ. ބައެއް އިންވޮއިސް ބަލާލަން ހުރުމާއެކު އޭނާ މަސައްކަތުގައި މަޝްޣޫލު ވެއްޖެއެވެ.

ގަޑިން އެކެއް ޖެހުމާއެކު ދޮރުގައި މީހަކު ޓަކި ޖަހައިފިއެވެ.

[ކާކު ހެއްޔެވެ؟] ޖަލާލީ މަސައްކަތުގައި އިނދެފައި ބުންޏެވެ.

[މެންދުރު ކޭން ބައްލަވާނީ ގެއިންތޯއެވެ.] ޖަޔާ ބޭރުގައި ހުރެގެން ސުވާލުކުރިއެވެ. އޭނާގެ ހަށިގަނޑުގެ އެއްބައި ޖަލާލީއަށް ފެނެއެވެ.

ޖަލާލީ ހިތްދަތި ކަމާއެކު ހިނިތުން ވެލިއެވެ. އަދި ތެދުވަމުން ބުންޏެވެ. [ޝުކުރިއްޔާއެވެ!]
[ކޭން ބައްލަވަންޏާ އެތެރެއަށް ދުރުވާށެވެ.] އޭނާގެ އަޑު ކުރެހިފައިވެއެވެ. ކުޑަކޮށް ރުޅިވެސް އަތުވެއްޖެއެވެ. އިޝާރާތުން އޭނާގެ ޖަޒްބާތުތައް ފާޅުކޮށްދޭން މަސައްކަތް ކޮށްކޮށް ވަރުބަލިވެއްޖެއެވެ. އެކަމަކު ޖަލާލީއަކަށް ނުވިސްނުނެވެ. އެއީ ސޭކެއްނޫން ކަމެއްވެސް ނޭގެއެވެ. ޖަޔާއަށް ފާޅުގައި އެކައްޗެއްވެސް ނުބުނެވުނެވެ.

ޖަލާލީގެ ޖަވާބެއް ލިބުމުގެ ކުރީގައި އޭނާ އެތަނުން ހިނގައްޖެއެވެ.

ޖަޔާ ދިޔުމަށްފަހު ޖަލާލީ އަނެއްކާވެސް ގޮނޑީގައި އިށީދެއްޖެއެވެ. ފައިލް ލައްޕާލިއެވެ.

އެތައް އިރެއް ވަންދެން ސިގިރޭޓް ރޯކޮށްލައިގެން ވިސްނަން އިނެވެ. ދެން ކޮޅަށް ތެދުވެއްޖެއެވެ. ޖަޔާ ކާން އަންނާށޭ ބުނުމުން ދާންވެސް ޖެހޭނެއެވެ.

އޭނާ މަޑުމަޑުން ހިނގާފައި އޮފީހުން ބޭރަށް ނުކުމެއްޖެއެވެ. ކޮރިޑޯ ހުރަސް ކުރިއެވެ. ދެން ލިވިންގރޫމަށް އަތުވެއްޖެއެވެ.

އަދި...... ޖެހިލުންވެހުރެ ބަދިގެއަށް އަތުވެއްޖެއެވެ.

ޖަޔާ ބަދިގެއަކު ނެތެވެ.

މޭޒުމަތީގައި ކާންހަދާފައި ހުއްޓެވެ. އެއީ ހެނދުނު ފުރިޖުގައި ހުރި ކާއެއްޗެއްސެވެ. މިހާރުހުރީ ހޫނުކޮށް ތާޒާ ކޮށްފައެވެ. އެއިން މީރުވަސް އަރައަރާ ހުއްޓެވެ. އެއީ ޕާކިސްތާނު ކާނާއެވެ. މިވަސް ނޭފަތުގައި ޖެހުމާއެކު މާޟީގެ ހަދާންތަކުގެ ތެރެއިން އޭނާގެ ގޭގެމަތިން ހަނދާން ކުރެވުނީ ކިހިނެއްވެގެންކަމެއް ނޫނގެއެވެ. ވަހަކީ މަލަކުން ދުވިޔަސް ކާ އެއްޗަކުން ދުވިޔަސް ހަދާން ނެތިގެންދާނެ އެއްޗެއް ނޫނެވެ. ސިކުނޑީގައި އަބަދުގެ އަބަދަށް ރައްކާތެރި ކުރެވިފައި ހުރެއެވެ. އެހެންކަމާއެކު މޭޒުމަތީގައި ތައްޔާރުކޮށްފައި ހުރި ކާއެއްޗެހިން އަރާ މީރުވަހުން ޖަލާލީއަށް ގޭގެމަތިން ހަނދާން ކުރެވުނީއެވެ.

އެގެއަކާ އޭނާއާ އެއްވެސް ގުޅުމެއް ނުހުރެއެވެ. އެކަމަކުވެސް ބައެއް ފަހަރު ވަރަށް ގަދައަށް ގޭގެމަތިން އޭނާއަށް ހަނދާން ކުރެވެއެވެ. އެއްބަނޑު އެއްބަފާ ހުރިހާ ކުދިންވެސް އޭނާގެ ހުތުރުކަމާމެދު ވާހަކަ ދައްކާ އުޅެއެވެ. ގޮތްގޮތަށް ދުއްތުރާދީ ހަދައެވެ. އެކަމަކުވެސް އަމިއްލަ ވަންތަކަމުގެ އަޖައިބު އިޙްސާސެއް ވިސްނުމުގައި އަށަގެންފައިވެއެވެ.

އަމިއްލަ ވަންތަކަން.....

އިންތިހާ ދަރަޖައިގެ އަގުމާތް ތަކެތިން އާރާސްތު ކުރެވިފައިވާ މިގެއިންވެސް އޭނާއަށް އަމިއްލަ ވަންތަކަން އިޙްސާސް ކުރެވެއެވެ.

މިއަދު މިކާ އެއްޗެއްސާ އަދި އެއިން އަރާ މީރުވަސް......

އޭނާ ކެތްތެރިކަން ކުޑަވެއްޖެއެވެ. އެކަމަކު އޭނާ މިހާރު ގޭގައި މިއުޅެނީ ބީރައްޓެހިކަމާ ދުރުހިލޭކަމުގެ ރިހުން އަންދާޒާކުރާ ފަދަ ގޮތަކަށެވެ. އޭނާ އެމަރުޙަލާތައް ކަޑައްތު ކުރަނީއެވެ.

މޭޒުމަތީގައިހުރީ އެކަނި ކާތަށީގެ އެންމެ ތަށްޓެކެވެ. އަދި ބަދިގޭގައި ޖަޔާވެސް ނެތެވެ. އޭނާއާއެކު ނާޖިޔާވެސް ކެއުމުގެ އުނދަގޫ އުފުލާނެ ނަމައެވެ.   އެކަމުން ޖަލާލީއަށް ކޮންމެވެސް ވަރެއްގެ ހަމަޖެހުމެއް ލިބުނީހެވެ. ކުޑަ މިންވަރަކަށް ނަމަވެސް އަމިއްލަވަންތަ ކަމުގެ އިޙްސާސް ހޭލަން ފެށީހެވެ. ޖަޔާ ބަލާ ދާން އޭނާގެ ހިތަށް އެރިއެވެ.

ޖަލާލީ އެނބުރި ހިނގައިގަތެވެ. ޖަޔާ ބަލައެވެ. އެކަމަކު......

ބަދިގެއަކުން ނުނިކުމެވުނެވެ. ޖަޔާ އޭނާއާ އެކުގައި ކާން އައިސް މޭޒު ކައިރީގައި އިށީނުމުގެ ބޭނުމަކީ ކޮބައި ހެއްޔެވެ. އެގޮތަށް ކެއުން އޭނާއަށް ޙަރާމެވެ.