މި ލިޔުމުގައި ދެކަމެއް ފާހަގަ ކުރެވުނު. ފުރަތަމަ ކަމަކީ ޒަމާނީ ޓެކްނޯލޮޖީގެ އެހީގައި އިސްލާމީ އަޚްލާޤީ އާ ވެށްޓަކަށް ލޯހުޅުވާލަ ދިންކަން. ދެވަނަ ކަމަކީ އުސްތާޛު މުޢީދު އީޖާދު ކުރައްވާފައިވާ ވަރަށް ހިތްގައިމު އާ ޖުމުލައެއް. އެއީ ''ހިކިފަނުގައި އަލިފާން ރޯވާހާ ހަލުއިކޮށް'' މި ޖުމުލަ. މި ޖުމުލަ ފާހަގަ ކޮށްލެނުނު ސަބަބަކީ، މީގެ ކުރިން މުޅިންވެސް އަޑު އިވެނީ ހިކި ކަފަ ދަނޑެއްގައި އަލިފާން ރޯވާވާހަކަ. އެކަމަކު ހިކި ކަފަ ދަނޑަކީ، ދިވެއްސަކަށް ވަރަށް މަދުން ނޫނީ ފެންނާނެ ތަނެއް ނޫން. އެހެންވީމާ އެމިސާލު ބަހުގައި ދިވެހިވެށީގެ އަސަރެއްނެތް. މުޢީދު ގެންނަވައިފައި އޮތް ގޮތުން މައްދިވެހި މިސާލަކަށް މިހާރު އެ މިސާލު ވެއްޖެ. އެހެންކަމުން މި ކަމަށްޓަކައި މުޢީދަށް ޝުކުރުދަންނަވަން.

ދެވަނަ ބޭފުޅަކު ހުށަހެޅުއްވި ޚިޔާލުފުޅު އަޅުގަނޑަށް ފެންނަ ގޮތެއް ނުވިއެވެ. ނަމަވެސް، އަޅުގަނޑަށް ކުށްބަހެއް ލިޔެވިފައިވާނަމަ، އެކަން ޔަޤީންވާ ބޭފުޅަކު، އެބަހެއް އިޞްލާޙުކުރެއްވުމަކީ، އަޅުގަނޑު އެދޭ ކަމެކެވެ.

މުޢީދު އަރިހުންނާއި މުވާޠިނުގެ އަރިހުން މާފު އެދެމުން އަޅުގަނޑު ދަންނަވައިލީ ޚަބަރެއް ފެތުރޭލެއް ހަލުއިކަން ބަޔާންކުރުމަށް ދިވެހި ލިއުންތަކުގައި ''ހިކިފަނުގައި އަލިފާން ރޯވާހެން"، "ހިކިފަތުގައި އަލިފާން ރޯވާހެން"، "ހިކިހޯލިތަކެއްގައި އަލިފާން ރޯވާހެން" މި ފަދަ ގޮތްގޮތަށް ލިޔެފައިހުއްޓާ އަޅުގަނޑު ދެކޭ ހަނދާންވާ ކަމަށާއި، ނަމަވެސް "ހިކި ކަފަ ދަނޑެއްގައި އަލިފާން ރޯވާހެން" ނޭ ލިޔެފައި އޮތްވައި އަޅުގަނޑަށް ފެނިފައި ނެތް ވާހަކައެވެ. މުވާޠިނެކޭ އެއްފަދައިން އަޅުގަނޑުވެސް "ހިކި ކަފަ ދަނޑެއްގައި އަލިފާން ރޯވާހެން" މި މިސާލުބަހަކީ ދިވެހި ވެށްޓާ ގުޅޭ މިސާލުބަހެއް ކަމަކަށް ނުދެކެމެވެ.

މުވާޠިނަށާއި މީމަށް އިޚުލާޞްތެރި ޝުކުރު ދަންނަވަމެވެ. އަޅުގަނޑަށް ފެންނަނީ ތި ހުރިހާ މިސާލު ބަހެއް ވެސް ރަނގަޅު ކަމަށެވެ. އަޅުގަނޑަކީ ދިވެހި ބިމުގައި އަމިއްލައަށް ކަފަގަހެއް ހެއްދި މީހަކީމެވެ. ފަން، ފަތް، ހިކި ހޯލި، ކަފަ އަދި މިނޫން ތަކެތި ބޭނުންކޮށްގެން ވެސް މިސާލުބަސްތައް އުފައްދަންވީއެވެ.
ދިވެހި ސަގާފަތުގައި ކަފައާއި އަލިފާނަކީ ވަރަށް ގުޅުން ބޮޑު ދެ މިތުރުންނެވެ. ކަފަ ބާލީހުގައި ރޯވި އަލިފާން ގަނޑު ފެތުރިގެން ގޮސް މުޅި ގެ އެކީގައި އަނދާ ހުލިވި ކަމަށް ބުނާ ވާހަކައެއް އަޑުއެހީމެވެ.

ދިވެހިބަހުގައި ކުރިއްސުރެން ބޭނުންކުރާ އެހެން ގޮތެއް ވެސް އޮވޭ. އެއީ "ބޯކެޔޮ ވަލަކު ހުޅުލީ ހެން". (http://www.qaumiyyath.gov.mv/basfoiy/#bas) މުޢީދު ވިދާޅުވިހެން އެއް ކަމަކަށް ގިނަ މިސާލު ބަސްތަކެއް ހުރުމުން ބަހުގެ މުއްސަނދިކަން އިތުރުވާނެ.